დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ჯანდაცვის მინისტრი ეკატერინე ტიკარაძე ადასტურებს, რომ კატასტროფის ცენტრმა სწრაფი ტესტების გამოყენებაზე აკრედიტაცია გაიარა. მისი თქმით, ეს იმ 4 კომპანიის ჩამონათვალშია, რომელსაც სამედიცინო რეგულირების სააგენტომ ტესტების შემოტანის უფლება მისცა.

კითხვაზე, ამ კომპანიაში ტესტის 150-ლარიანი ღირებულება დადგენილია თუ არა მთავრობის მიერ, მინისტრი პასუხობს, რომ ამ საკითხზე ჯერ კიდევ მუშაობენ და საბაზრო ღირებულება მოგვიანებით გახდება ცნობილი.

ჯანდაცვის მინისტრის მოადგილე, თამარ გაბუნია განმარტავს, რომ რეგულირების სააგენტო და ჯანდაცვის სამინისტრო შეამოწმებენ, როგორ მუშაობენ იმ კომპანიების ლაბორატორიები, ვისაც ტესტირების უფლება მიენიჭა. მისივე თქმით, ეს საჭიროა იმისთვის, რომ ტესტების გამოყენებას უკონტროლო და კომერციული ხასიათი არ ჰქონდეს.

"რა თქმა უნდა ძალიან მკაცრად განვსაზღვრავთ იმ პირობებს, რა ფასით და რა ჩვენებებით უნდა ხდებოდეს ტესტის გამოყენება, რადგან ყველა არასწორად გამოყენებულმა ტესტმა შეიძლება გამოიწვიოს პანიკა, დაბნეულობა, მცდარი კლინიკური დასკვნა და მიგვიყვანოს ცუდ კლინიკურ გამოსავლებამდე", — განაცხადა გაბუნიამ.

ტესტების შესახებ ინფორმაცია კატასტროფის ცენტრმა გუშინ, 27 მარტს გამოაქვეყნა. ისინი ტესტირებას მსურველებს სახლში მისვლით სთავაზობენ.

ბოლო რამდენიმე დღეა სწრაფი ტესტების საკითხი პოლიტიკური სპეკულაციებისა და კრიტიკის საგანი გახდა. ოპოზიციაში აცხადებენ, რომ სახელმწიფოს აქამდე უნდა ეზრუნა სწრაფი ტესტების შემოტანაზე და კერძო კომპანიებისთვისაც უნდა გაემარტივებინა ამ მხრივ საქმე, რაც მოსახლეობის უფრო ფართოდ ტესტირებას შეუწყობდა ხელს.

ხელისუფლების წარმომადგენლები კი აცხადებდნენ, რომ ეპიდემიის დროს კომერციული ტესტირება არაეთიკურია. პრემიერ-მინისტრ გიორგი გახარია კი ამბობდა, რომ სწრაფი ტესტები პოლიტიკური ინსტრუმენტია ზოგიერთი "უპასუხისმგებლო პოლიტიკოსის", რომელსაც წარმოდგენა არ აქვს, ამ სწრაფ ტესტს, შემდგომ განვითარების რა ეტაპები უნდა მოჰყვეს. მისივე განმარტებით, სწრაფი ტესტები პანაცეა არაა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: