დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს მართლმადიდებელი ეკლესიის საპატრიარქო კორონავირუსის დროს ღვთისმსახურების ჩატარებასთან დაკავშირებულ კრიტიკას ეხმაურება. როგორც საპატრიარქოში ამბობენ, ზოგიერთი საინფორმაციო საშუალებით ხელოვნურად მზადდება აზრი, რათა შესაძლო პრობლემების მიზეზად ეკლესია გამოცხადდეს.

"ზოგიერთი საინფორმაციო საშუალება კი ვითარებას ისე წარმოაჩენს, რომ გვიჩნდება განცდა, ხელოვნურად მზადდება საზოგადოებრივი აზრი, რათა მომავალში შექმნილ შესაძლო პრობლემების მიზეზად ეკლესია გამოცხადდეს იმის მიუხედავად, რომ სწორედ ეკლესია ცდილობს, მაქსიმალურად დაიცვას სახელმწიფოს და, მათ შორის, დაავადებათა კონტროლის ეროვნული ცენტრის მიერ დადგენილი უსაფრთხოების ზომები", — აღნიშნულია განცხადებაში.

როგორც საპატრიარქო განმარტავს, დისტანციის დაცვის გარდა, შვიდგზის ზეთისცხებასა და წირვა-ლოცვებზე სასულიერო პირებს მრევლის სხვადასხვა დღეებში გადანაწილება შეუძლიათ. გარდა ამისა:

"ვირუსის გავრცელებაზე საუბრისას, ჩვენთვის გაუგებარია, რატომ კეთდება დიდი აქცენტი სულიერი საზრდოს მისაღებად კვირაში ერთხელ საეკლესიო მსახურებაზე მყოფ მორწმუნეებზე მაშინ, როდესაც ტაძარში მრევლის რაოდენობა ბევრად ნაკლებია, ვიდრე, მაგალითად, გადაუდებელი აუცილებლობის გამო საზოგადოებრივ ტრანსპორტში (ავტობუსი, მეტროპოლიტენი), სააფთიაქო ქსელში ან სურსათის მაღაზიებში ყოველდღიურად მისულ მოქალაქეებთან შედარებით".

საპატრიარქოს განცხადებით, ვინც უარს ამბობს ერთი ბარძიმიდან ზიარებაზე, ის უარს ამბობს მაცხოვარზე. მათივე თქმით, ტაძარში მსახურებაზე დასწრების აკრძალვა მათთვის, ვისთვისაც ეს აუცილებელია, გაუმართლებელია და "დანაშაულია ღვთის წინაშე".

"გვესმის, რომ ზოგიერთი შეიძლება რწმენაში დაბრკოლდეს იმ პროპაგანდით, რაც დღეს მსოფლიოში და ჩვენს ქვეყანაშიც მიმდინარეობს; არიან სასულიერო პირებიც, რომლებიც ტაძარში ხალხის დასწრებაში პრობლემას ხედავენ, პრობლემას ხედავენ მრევლის ზიარებაშიც… (არ ვგულისხმობთ უცხოეთში მკაცრ საგანგებო რეჟიმში მყოფ მოძღვრებს).
გვინდა, ყველას ვუთხრათ, რომ, მსგავსად სნეულებაში მყოფი ადამიანებისა, ისინიც, ვინც ვირუსით დაავადების საფრთხეს ეკლესიაში მისვლას უკავშირებენ, დარჩნენ სახლში და თავისი მოძღვარი, სურვილის შემთხვევაში, ადგილზე მიაკითხავს", — აღნიშნულია განცხადებაში.

კორონავირუსის პანდემიის დროს ზოგიერთმა მართლმადიდებელმა ეკლესიამ მიიღო გადაწყვეტილება, რომ ღვთისმსახურებას მრევლი აღარ დაესწრებოდა. ეს ხდება საბერძნეთში, ბულგარეთში, უკრაინაში. რელიგიური მსახურებისა და წესის შესრულება შეწყვიტა მსოფლიო პატრიარქმა.

საქართველოს მართლმადიდებელი ეკლესიის მღვდელმთავრები 20 მარტს შეიკრიბნენ. სინოდის სხდომის განჩინებით, ზიარების წესი არ იცვლება. გარდა ამისა, ღვთისმსახურებას მრევლი ჩვეულებრივად დაესწრება, ოღონდ საპატრიარქოში ამბობენ, რომ აუცილებელი იქნება დისტანციის დაცვა.

სინოდის სხდომის ჩატარებიდან მეორე დღეს, ქვეყანაში საგანგებო მდგომარეობა გამოცხადდა, რომლის თანახმადაც ათზე მეტი ადამიანის შეკრება იკრძალებოდა. როგორც მთავრობის წევრები განმარტავდნენ, აღნიშნული შეზღუდვა ეხობდა ყველას, მათ შორის ეკლესიასაც.

საგანგებო მდგომარეობის მიუხედავად 22 მარტის საკვირაო წირვა სამების ტაძარში შეუფერხებლად გაიმართა. წირვას დაესწრო კათოლიკოს პატრიარქი ილია მეორეც. ტაძარში შეკრებილ მრევლს პერიოდულად აფრთხილებდნენ, დაეცვათ დისტანცია, თუმცა მათი ნაწილი ამას ვერ ახერხებდა. ზოგიერთი მათგანი პირბადის გარეშე იყო მისული. წირვისას საერთო კოვზით ჩატარდა ზიარების რიტუალიც.