ინფექციური საავადმყოფოს დირექტორმა, თენგიზ ცერცვაძემ TV პირველის ეთერში განაცხადა, რომ იგი ბოდიშს იხდის, თუკი მოძრაობა სირცხვილიას აქტივისტ ნოდარ რუხაძეზე ყალბი ინფორმაცია გააჟღერა. დეზინფორმაციის შესახებ ცერცვაძეს წამყვანმა, თამარ ჩიხლაძემ პირდაპირ ეთერში უამბო.

მანამდე შალვა რამიშვილთან ინტერვიუსას ცერვაძემ განაცხადა, რომ "ფეისბუქზე შემთხვევით ნახა", მოძრაობა სირცხვილიას აქტივისტის ფოტო, და წარწერა შინაარსით: კორონავირუსი კარგია, რადგან თაობათა ცვლას უწყობს ხელს.

"ამ ახალგაზრდამ დაწერა, რომ კორონავირუსი არ არის ცუდი მოვლენა, ის იმისთვის არის შექმნილი, რომ თაობათა ცვლას შეუწყოს ხელი და 70 წელს გადაცილებული ადამიანებისგან გაწმინდოს საზოგადოებაო. მერე რომ გადავხედე კომენტარებს, როგორი კომენტარები და როგორი ნახატები იყო იცით? როგორი შეწუხებული, განრისხებული..." — განაცხადა ცერცვაძემ.

მას საუბრისას არ დაუსახელებია, რომელ აქტივისტს გულისხმობდა, თუმცა მოგვიანებით, ამ განცხადებას ფეისბუქგვერდზე გამოეხმაურა ნოდარ რუხაძე, რომელმაც ცერცვაძეს განუმარტა, რომ მსგავსი არაფერი უთქვამს და ეს დეზინფორმაცია იყო. სწორედ ეს პოსტი წაუკითხა TV პირველის წამყვანმა ექიმს, რაზეც მან განაცხადა:

"მე დარწმუნებული ვარ იმაში, რომ ნამდვილად წავიკითხე. მისი სახელი და გვარიც ეწერა და ფოტოც იდო. ნამდვილი იყო თუ არა ეს ე.წ ფეიკ ნიუსი, ამაში დარწმუნებული არ ვარ... მე ძალიან დამწყდა გული, არა იმიტომ, რომ მე თვითონ ასაკოვანი ვარ, ჩვენი ქართული ტრადიციები არ გულისხმობს იმას, რომ ასაკოვან ადამიანებს პატივი არ ვცეთ. თუ ეს ფეიკ-ნიუსია, მე ძალიან კმაყოფილი დავრჩები და ამაღლებული განწყობით გავალ აქედან. ის წყენა თუ დისკომფორტი, რაც მას მიადგა, კარგი არ არის, მაგრამ მცირეა იმასთან შედარებით, რაც შეიძლებოდა, ეს რომ სიმართლე ყოფილიყო. მე სიამოვნებით, თუ ეს ფეიქ-ნიუსი იყო, მას ბოდიშს მოვუხდიდი".

პოსტი, რომელზეც თენგიზ ცერცვაძემ ისაუბრა, დეზინფორმაციის გამავრცელებელ ერთ-ერთ ფეისბუქგვერდ სირცხვილის კორიდორზე გავრცელდა.

ეს პირველი შემთხვევა არ არის, როდესაც აღნიშნული გვერდი დეზინფორმაციულ კამპანიას აწარმოებს აქტივისტების წინააღმდეგ. მსგავსი მესიჯბოქსებით გვერდი თავს ესხმის ოპოზიციის ლიდერებსაც და ხშირად აჟღერებს პროსახელისუფლებო მესიჯებსაც.

გაიგეთ მეტი პროსახელისუფლებო ფეისბუქგვერდების დეზინფორმაციულ კამპანიაზე: