მაშინ, როცა მთელ მსოფლიოში კორონავირუსის გავრცელების გამო უამრავი ფილმისა თუ სერიალის წარმოება შეწყდა, რამაც შესაბამისად მრავალი ადამიანი სამსახურის გარეშე დატოვა, ნეტფლიქსმა დააანონსა, რომ 100 მილიონი დოლარი გამოყო, რათა სწორედ კინო და სატელევიზიო ინდუსტრიაში უშემსოავლოდ დარჩენილ ადამიანებს დაეხმაროს.

დაფინანსების ძირითადი ნაწილი იმ თანაშრომლებს მოხმარდებათ, რომლებიც ნეტფლიქსის პროექტებზე მუშაობდნენ: მათ შორის ისეთი სერიალების გადაღებებზე, როგორებიცაა The Witcher და Stranger Things.

"Covid-19-ის მიერ გამოწვეულმა კრიზისმა მრავალი ინდუსტრია დააზარალა, მათ შორის შემოქმედებითი საზოგადოებაც: თითქმის ყველა კინო და სატელევიზიო წარმოება მთელ მსოფლიოში შეჩერებულია, რამაც ასობით ათასი ადამიანი უმუშევარი დატოვა. ამ ადამიანებს შორის არიან ელექტრიკოსები, დურგლები და მძღოლები, რომლებსაც ძირითადად საათობრივი ანაზღაურობა ჰქონდათ და კონკრეტულ პროექტებზე მუშაობდნენ. ეს ადამიანები ნეტფლიქსს გვერდში ედგნენ, როცა კარგი დრო იყო, ახლა კი ნეტფლიქსს უნდა, რომ გვერდში დაუდგეს მათ ამ მძიმე დროს, როცა მთავრობა ჯერ კიდევ იმ გეგმაზე მუშაობს, თუ როგორი ეკონომიკური მოდელით შეძლებს მათ დახმარებას", — განაცხადა კომპანიის წარმომადგენელმა, ტედ სარანდოსმა.

კომპანიის მიერ გამოყოფილი თანხიდან $15 მილიონი აშშ-ს გარდა იმ ქვეყნებში მყოფი თანამშრომლების ფინანსური დახმარებისთვისაა, სადაც ეს კომპანია ძირითად პროდუქციას აწარმოებს.

როგორც ცოტა ხნის წინ გახდა ცნობილი, პანდემიის მიერ გამოწვეული კრიზისის გამო მარტო აშშ-ში კინო და ტელეინდუსტრიაში დასაქმებულმა 120 000-ზე მეტმა ადამიანმა დაკარგა სამსახური. მთელ მსოფლიოში შეჩერებულია ისეთი მასშტაბური პროექტების გადაღება, როგორებიცაა ავატარის, მატრიცას, იურიული პარკისა და შეუსრულებელი მისიის ახალი ნაწილები.

ასევე იხილეთ: