დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ექიმი, ინფექცინისტის, მარინა ენდელაძის თქმით, კორონავირუსით ინფიცირებულ მეოთხე პაციენტთან მძიმე მდგომარეობა გადალახულია და მისი მდგომარეობა უმჯობესდება. ამის შესახებ ექიმმა TV პირველის ეთერში ისაუბრა.

"პაციენტების მდგომარეობა სტაბილურია ყველასი, არიან მძიმე პაციენტები, მათ შორის, ერთ-ერთი განსაკუთრებით. კიდევ უფრო მძიმე გვყავდა დინამიკაში, ცოტა ნაკლებს ვამბობდით კიდევაც და გარკვეული შიშებიც გვქონდა, მაგრამ გადავლახეთ ეს პერიოდი, უკვე მივდივართ დადებითი დინამიკისკენ, უკვე აღარ გვეშინია, #4 პაციენტი, დიახ", — თქვა მარინა ენდელაძემ.

ექიმმა აღნიშნა, რომ ჯერ ისევ არიან პაციენტები, მათ შორის შედარებით ახალი პაციენტები, რომლებთანაც წინასწარი პროგნოზირება ძნელია. ამის მიზეზი ისაა, რომ დაავადება მწვავედ არ იწყება და ერთბაშად არ ვლინდება. მარინა ედელაძის თქმით, იმედი აქვთ, რომ ყველა პაციენტი გამოჯანმრთელდება.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურეობის ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლდება, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაჰყავს. ამ ეტაპზე იძულებით კარანტინშია გადაყვანილი 99 ადამიანი. პარლამენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: