კომუნიკაციების კომისია მიმართავს ყველა მობილურ ოპერატორს, არ დაუშვან კორონავირუსთან დაკავშირებით მიზანმიმართულად შეცდომაში შემყვანი სმს შეტყობინებების გავრცელება. ამის შესახებ კომისიის მიერ გავრცელებულ განცხადებაშია ნათქვამი. მათივე ინფორმაციით, ამ მიზნით კომუნიკაციების კომისიამ უკვე დაავალა მისი რეგულირების სფეროში შემავალ ყველა ავტორიზებულ პირს, "უსწრაფესი" რეაგირება მოახდინონ.

ასევე, კომისიამ ყველა ავტორიზებულ პირს მისცა მითითება დაუყონებლივ შეუზღუდონ სმს (A2P) შეტყობინებების გავრცელება არაავტორიზებულ პირებს, რომლებიც "ბოროტად სარგებლობენ" მობილური ოპერატორების სერვისით და საზოგადოებას "შეცდომაში შემყვან" ინფორმაციას აწვდიან.

16 მარტს, საქართველოს მთავრობამ კორონავირუსთან დაკავშირებით მთელი საქართველოს მოსახლეობას რეკომენდაციები და ინფორმაცია შეტყობინებების სახით გაუგზავნა, რითაც, კომისიის თქმით, "ბოროტად ისარგებლეს" დაინტერესებულმა პირებმა. მათივე ცნობით მთავრობის სმს-ის გავრცელებიდან, დაახლოებით ორ საათში მთავრობის სახელით "ფეიკ შეტყობინების" გავრცელება დაიწყეს, მოგვიანებით კი, ანალოგიურად ყალბი შეტყობინება გავრცელდა ჯანდაცვის სამინისტროს სახელით.

კომისიის თქმით, სმს-ების გამავრცელებლის მიზანს საზოგადოების კიდევ უფრო დაძაბვა და მათი შეცდომაში შეყვანა წარმოადგენდა.

"ქვეყანაში შექმნილი ვითარებიდან გამომდინარე, უმნიშვნელოვანესია მობილურმა კომპანიებმა მოახდინონ უსწრაფესი რეაგირება, რათა აღიკვეთოს შეცდომაში შემყვანი შეტყობინებებისა და არასათანადო სოციალური რეკლამების გავრცელება. იმ შემთხვევაში, თუ ავტორიზებული პირების მიერ არ მოხდება შეცდომაში შემყვანი ინფორმაციის გავრცელების შეზღუდვა, კომუნიკაციების კომისია მისი რეგულირების სფეროში შემავალი კომპანიების მიმართ, კანონით გათვალისწინებულ უმკაცრეს ზომებს გაატარებს და საჭიროების შემთხვევაში, ავტორიზაციას შეუჩერებს მათ", — ნათქვამია კომისიის განცხადებაში.

კომისია ავალებს მისი რეგულირების სფეროში შემავალ ყველა კომპანიას, რომ კორონავირუსთან დაკავშირებით, ინფორმაცია და რეკომენდაციები საზოგადოებას მხოლოდ ოფიციალურ უწყებებზე დაყრდნობით მიაწოდონ.