ალბათ ბევრს წაგვიკითხავს გურამ პეტრიაშვილის ზღაპარი, რომელიც გოგონასა და ოქროს თევზის საოცარ მეგობრობაზე გვიამბობს.

Halfpace Studio ზღაპრის ანიმაციურ ფილმად ქცევას აპირებს, რომელიც გასართობთან ერთად, შემეცნებითი დატვირთვისაც იქნება. როგორც პროექტის ხელმძღვანელმა და პროდიუსერმა ლევან ლაფაჩიმ On.ge-სთან საუბრისას აღნიშნა, მაყურებელი მასში უამრავ დაფარულ მესიჯსაც აღმოაჩენს.

ანიმაციურ ფილმში The Girl And A Golden Fish არ იქნება დიალოგები, შესაბამისად, მისი აღქმა ერთნაირად მარტივი იქნება ნებისმიერი ეროვნების ადამიანისთვის.

„რეალურად, ფილმს აქვს უდიდესი პოტენციალი გავიდეს ისეთ ქვეყნებში ფესტივალებზე, როგორიცაა ამერიკის შეერთებული შტატები, ინგლისი, საფრანგეთი, გერმანია და ასე შემდეგ” - გვითხრა ლევან ლაფაჩიმ.

ფილმის გამოსვლის თარიღი, ჯერ-ჯერობით, უცნობია. გუნდი სექტემბერში თიზერის გამოშვებასთან ერთად გეგმავს დაფინანსების კამპანიის დაწყებასა და ინფორმაციის შემოწირულობების საიტებზე განთავსებას.

ანიმაციურ ფილმზე ამ ეტაპზე მუშაობენ:

  • ლევან ლაფაჩი - პროდიუსერი, პროექტის ხელმძღვანელი, ანიმაციის სუპერვაიზერი;
  • ანუკა ბარათაშვილი - მხატვარი;
  • ირაკლი ღარიბაშვილი - არტ დირექტორი, ანიმატორი.

პროექტის ხელმძღვანელის თქმით, სამუშაო ეტაპებიდან გამომდინარე, გუნდი გაიზრდება და მასში იქნებიან სამ განზომილებიანი მოდელერები, რიგერები, ანიმატორები, განათების და რენდერის არტისტები და პოსტ პროდაქშენის არტისტები. ლევან ლაფაჩიმ აღნიშნა, რომ საქართველოში პროექტის დამფინანსებლის მოძებნა გაუჭირდათ:

„დაფინანსებას რაც შეეხება ამ ეტაპზე მთლიანად "ქრაუდ ფანდინგის" იმედი გვაქვს, რადგანაც ამ წლების განმავლობაში, სამწუხაროდ, საქართველოში არ მოიძებნა ის ადამიანი, ვინც მცირე რესურსის ჩადებით ამ სფეროს ასეულობით მილიონიან შემოსავლად აქცევდა, რომელიც ქვეყნისა და მისი ეკონომიკისთვის უდიდესი პლიუსი იქნებოდა. თუმცა, თუ ამ ეტაპზე მაინც გამოჩნდება ისეთი ადამიანი, რომელიც ჩვენი დახმარების სურვილს გამოთქვამს, მასთან სიამოვნებით გავივლით ფინანსურ დეტალებს და დავანახებთ ამ სფეროს მნიშვნელობას“.