20-21 ივნისის საქმეზე ბრალდებულ ბესიკ თამლიანის სხდომაზე ბრალდების მხარემ მტკიცებულებები წარადგინა თუმცა არ დაუსრულებია. სწორედ ამიტომ, ადვოკატმა ვერ მოასწრო აღკვეთის შეცვლის დაყენება. მომდევნო პროცესი 13 მარტს 14 საათზე გაიმართება.

10 მარტის სხდომაზე ზოგადი ნივთიერი მტკიცებულებების სახით პროკურორმა სხდომაზე დროშის ტარები წარმოადგინა, როგორც შემთხვევის ადგილიდან ამოღებული ნივთები. ადვოკატის თქმით, ამ ნივთებს თამლიანის საქმესთან და ბრალთან შეხება არ აქვს. სხდომაზე ბესიკ თამლიანმა განაცხადა, რომ სადაოდ ხდის ამ მტკიცებულებებს. მან პროკურორს მიმართა, "დაუმტკიცონ რომ რაიმე შეხება ჰქონდა ამ ჯოხებთან".

ბრალდების მხარემ აქციის დაშლის ამსახველი ვიდეომტკიცებულებაც წარადგინა. მათი თქმით, სწორედ იქ ჩანს ბრალის ამსახველი კადრი: პოლიციელის ფარზე დარტყმა.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში 20-მდე პირი მისცეს, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში. ასევე, პოლიტიკოსი, ირაკლი ოქრუაშვილი.