ევროკავშირის ელჩი საქართველოში, კარლ ჰარცელი ამბობს, რომ საარჩევნო სისტემასთან დაკავშირებით ჯერ კიდევ არსებობს მხარეებს შორის შეთანხმების შესაძლებლობა.TV პირველის თარგმანის მიხედვით, ჰარცელი აცხადებს, რომ შეთანხმება იქნება მესიჯი თანამეგობრობისთვის, რომ საქართველოში ცვლილებებია:

"ამის თქმის საფუძველია ის, რომ პოლიტიკური ხელმძღვანებლობა ორივე მხრიდან, როგორც ხელისუფლების, ისე, ოპოზიციის, მზად არიან განსაზღვრული ნაბიჯები გადადგან და კომპრომისზე წავიდნენ. არსებობს განვითარების სხვადასხვა სცენარი, თუ რა შეიძლება მოხდეს. არაფერი გარანტირებული არ არის, მაგრამ თუ შეთანხმება შედგა, ეს იქნება დიდი სიკეთის მომტანი ქვეყნისთვის. წარმატება ამ დიალოგში იქნება მესიჯი საერთაშორისო თანამეგობრობისთვის, რომ საქართველოში მიმდინარეობს ცვლილებები, მიუხედავად იმისა, რომ ქვეყანაში სირთულეები ჯერ კიდევ არსებობს".

2 მარტს ლეიბორისტული პარტიის ოფისში ოპოზიციის მორიგი შეხვედრა გაიმართა. შეხვედრის შემდეგ გიგა ბოკერიამ თქვა, რომ მმართველ გუნდთან "შეთანხმება და ნორმალიზაცია" ვერ მოხდება, თუ ისინი პოლიტპატიმრების საკითხზე და 130/20 საარჩევნო სისტემაზე არ დათანხმდებიან. მან აღნიშნა, რომ თუ ქართული ოცნება 130/20-ზე სისტემის კანონპროექტს შეიტანს ისინი მხარს დაუჭერენ და "სალაპარაკოს არ დაუტოვებენ".

საარჩევნო სისტემის ცვლილებაზე შესათანხმებლად ოპოზიციისა და ხელისუფლების შეხვედრები ელჩების ორგანიზებით იმართება. შეხვედრები ოპოზიციის ბოიკოტის გამო არაფორმალურია. ამ ეტაპზე უკვე 3 შეხვედრა გაიმართა, მათ შორის აშშ-ს, ევროკავშირისა და გერმანიის საელჩოების ორგანიზებით.

მას შემდეგ, რაც საარჩევნო სისტემაზე საუბარი განახლდა, ოპოზიციამ მოითხოვა, რომ უმრავლესობის ჩამოყალიბება ვერ შეძლოს ვერცერთმა პარტიამ, რომელიც ხმების 40%-ზე ნაკლებს აიღებს. ოპოზიციის განცხადებით, ერთადერთი თანაფარდობა, რომელიც უზრუნველყოს წარმომადგენლობის პროპორციულობას არის 130/20-ზე. მათი მთავარი მოთხოვნა იყო დაკავებული ოპოზიციონერების გათავისუფლებაც.

ქართულ ოცნებაში განაცხადეს, რომ 40%-იან ბარიერზე თანახმა არიან, რადგან 50%-ზე ნაკლების აღებას არ აპირებენ. საპასუხოდ მათ ოპოზიციას 110/40-ზე ფორმატი შესთავაზეს, თუმცა დაკავებულ ოპოზოციონერებს ისინი პოლიტპატიმრებად არ მიიჩნევენ. ამიტომ ოპოზიციამ მოლაპარაკებების მეხუთე რაუნდზე უარი განაცხადა.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".