სახელმწიფო უსაფრთხოების სამსახური საოკუპაციო ხაზზე ახალი მავთულხლართების გავლებას უარყოფს.

ერგნეთში საოკუპაციო ხაზის რამდენიმე მეტრით გადმოწევისა და მავთულხლართების გავლების შესახებ მთავარ არხთან აქტივისტმა, დავით ქაცარავამ ისაუბრა. მისივე თქმით, აღნიშნული მავთულხლართები ერთი კვირის წინ არ იყო და ამას ადგილობრივი მოსახლეობაც ადასტურებს.

როგორც სუს-ში On.ge-ს განუცხადეს, აღნიშნული მწვანე ფერის ღობე უკანონოდ 2012 წელს აღიმართა და მავთულხლართები 2019 წელს დამონტაჟდა.

"ცენტრალურ ხელისუფლებას აქვს შეურიგებელი პოზიცია უკანონო ე.წ. ბორდერიზაციის მიმართ. თითოეულ უკანონო ფაქტზე აქტიურდება ცხელი ხაზი და მომხდარის შესახებ ინფორმაცია მიეწოდება როგორც ევროკავშირის სადამკვირვებლო მისიას, ისე საერთაშორისო პარტნიორებს. უკანონო ე.წ. ბორდერიზაცია არის დღის წესრიგის ერთ-ერთი ძირითადი საკითხი, როგორც IPRM-ზე, ასევე ჟენევის საერთაშორისო დისკუსიებზე", — აცხადებენ უწყებაში.