კორონავირუსის გავრცელების ასარიდებლად, თურქეთიდან საქართველოს საზღვრის კვეთის რეჟიმი მკაცრდება. ამის შესახებ განცხადება საქართველოში თურქეთის გენერალურმა საკონსულომ ფეისბუქზე გაავრცელა.

როგორც განცხადებაში ვკითხულობთ, კორონავირუსის გავრცელების რისკებთან დაკავშირებით, საზღვრის კვეთისას მოქალაქეებს პასპორტის წარდგენა მოუწევთ. მათი ინფორმაციით, 26 თებერვლიდან დაიწყო იმ ტრაილერის მძღოლების პასპორტების შემოწმება, რომლებიც საქართველოში შემოსვლას აპირებენ.

მათივე განმარტებით, ამ დროისთვის თურქეთიდან საქართველოში ნებადართული არ არის შესვლა იმ შემთხვევაში, თუ ადამიანს ბოლო 21 დღის განმავლობაში ჩინეთში, ირანში, სამხრეთ კორეაში ან იტალიაში ვიზიტი უფიქსირდება.

როგორც საკონსულოს განცხადებაშია აღნიშნული კორონავირუსთან დაკავშირებით მიღებული ზომები შეიძლება შეიცვალოს.

26 თებერვალს საქართველოში ახალი კორონავირუსით ინფიცირების პირველი შემთხვევა დაფიქსირდა. ვირუსი დაუდგინდა საქართველოს მოქალაქეს, რომელიც აზერბაიჯანის გავლით ირანიდან საქართველოში შემოვიდა. მინისტრის თქმით, ის საბაჟოდან პირდაპირ ინფექციურ საავადმყოფოში გადაიყვანეს და სხვა ადამიანებთან შეხება არ ჰქონია. მისივე თქმით, მებაჟეები, რომლებმაც ის შეამოწმეს, პრევენციისთვის, კარანტინში მოთავსდებიან.

გაიგეთ მეტი კორონავირუსის პრევენციის შესახებ: