უკრაინის პრეზიდენტმა, ვოლოდიმირ ზელენსკიმ მთავრობის წევრებს მოსთხოვა, რომ მეშახტეების წინაშე არსებული დავალიანება სრულად გაისტუმრონ, წინააღმდეგ შემთხვევაში ხელფასს თავადაც ვერ მიიღებენ. მისი თქმით, მეშახტეების სახელფასო დავალიანება ერთი მილიარდი გრივნაა.

"ძალიან გთხოვთ უახლოეს ორ თვეში,ტ მარსა და აპრილში სრულად დაფარეთ მეშახტეების სახელფასო დავალიანება. თუ ვერ დავფარავთ და თუნდაც ერთ დღეს დავაგვიანებთ, ჩემი აზრით, სამართლიანი იქნება, თუ მთელი მთავრობა ვერ აიღებს ხელფასს ამ თვეების განმავლობაში", — განაცხადა ზელენსკიმ.

ეს პირველი შემთხვევა არ არის, როდესაც უკრაინის პრეზიდენტი მთავრობას ხელფასებით ემუქრება. რამდენიმე კვირის წინ მან განაცხადა, რომ მინისტრების ანაზღაურება არასამართლიანია, როცა ქვეყანაში ეკონომიკური პრობლემებია, ამიტომ მათ ახალი სახელფასო სისტემა შესთავაზა. მანვე განაცხადა, რომ ხელფასის მატება მარტო მაშინ იქნება შესაძლებელი, როცა ეკონომიკურ მატებას მიაღწევენ. მისივე თქმით, ვინც ახალ ხელფასს არ დათანხმდებოდა, მთავრობა უნდა დაეტოვებინა.