ქიბარ ხალვაშის საკუთრებაში გადასვლის შემდეგ ტელეკომპანია რუსთავი 2-მა რეიტინგების მთვლელი კომპანია შეცვალა. ინფორმაციას ადასტურებენ თივი ემარ საქართველოში, რომლის მომხმარებელიც არხი იყო და ახალი პარტნიორი ტრი მედია ინტელიჯენსიც.

როგორც თივი ემარ საქართველოს დირექტორმა, ნინო გოგოლაძემ On.ge-ს განუცხადა, რუსთავი 2-მა პირველი იანვრიდან მათთან ხელშეკრულება აღარ გააფორმა. On.ge-ს სურდა არხის დირექტორის, პაატა სალიასგან მოესმინა რეიტინგების მთვლელი კომპანიის შეცვლის მიზეზი, თუმცა მან სატელეფონო ზარებს არ უპასუხა.

სწორედ არხის მფლობელისა და დირექტორის შეცვლის შემდეგ დაიწყო რუსთავი 2-ზე რეიტინგის კლება და თითქმის განახევრდა. რეიტინგი არხის სახეებისა და საინფორმაციო სამსახურის ჟურნალისტების ახალ არხზე გადასვლასთან ერთად ეცემოდა.

მანამდე არსებული მენეჯმენტი, ნიკა გვარამია დირექტორობის დროს, მუდმივად რჩებოდა თივი ემარ საქართველოს მომხმარებელი. გვარამიას მსგავსად, ხელისუფლების მიმართ კრიტიკულად განწყობილი ტელევიზიებისთვის ტრი მედია ინტელიჯენსის საქმიანობა კითხვის ნიშნებს აჩენს.

რუსთავი 2-ის მსგავსად რეიტინგების მთვლელი კომპანიის შეცვლა არ მოუწევთ ხელისუფლების მიმართ კრიტიკულად განწყობილ ტელევიზიებს: მთავარ არხს, ფორმულას, TV პირველსა და კავკასიას. გადაწყდა, რომ თივი ემარ საქართველო ბაზრიდან აღარ გავა და საქმიანობას გააგრძელებს.

როგორ გაჩნდა თივი ემარ საქართველოს კონკურენტი

იმის მიუხედავად, რომ თითქმის ყველა აცხადებდა ერთსა და იმავეს – სარეკლამო ბაზარზე რეიტინგების მთვლელი ორი კომპანიის საჭიროება არ არსებობდა, 2016 წლიდან ბაზარზე ოპერირება დაიწყო ტრი მედია ინტელიჯენსმა. კომპანიის ბაზარზე შემოსვლიდან მალევე გაირკვა, ვინ შეიძლება ყოფილიყო მათი მომხმარებელი და ვინ – არა. საზოგადოებრივმა მაუწყებელმა სატენდერო პირობები შეცვალა, იმედი კი აცხადებდა, რომ "მოთხოვნების დაკმაყოფილების შემთხვევაში" ითანამშრომლებდა. ტრი მედია ინტელიჯენმსმა შეთანხმებას ვერ მიაღწია მაშინ ხელისუფლების მიმართ კრიტიკულად განწყობილ მედიებათან: რუსთავი 2-თან, TV პირველთან, კავკასიასთან და ა.შ.

წლების განმავლობაში ტრი მედია ინტელიჯენსი თი-ვი ემ-არ საქართველოზე გაცილებით დაბალ ფასად სთავაზობდა მომსახურებას საჯარო უწყებებს და ტელევიზიების ერთი ნაწილი მისი მომხმარებელი გახდა, თუმცა ამან კონკურენტის მუშაობას ხელი მაინც ვერ შეუშალა.

თი-ვი ემ-არ საქართველოსთვის პრობლემები 2016 წელს არ დაწყებულა. ამას წინ უსწრებდა ფინანსთა სამინისტროს შემოსავლების სამსახურთან რამდენიმეთვიანი სასამართლო დავა. უწყება მათგან იმ ოჯახების მისამართების მიწოდებას ითხოვდა, სადაც რეიტინგის მთვლელი მოწყობილობები იდგა. თი-ვი ემ-არ საქართველო მიიჩნევდა, რომ თუ მისამართებს გაამხელდნენ, რეიტინგების გაზომვა სანდოობას დაკარგავდა.