თბილისში, გლდანის მეშვიდე მიკრორაიონში, ერთ-ერთი საცხოვრებელ ბინაში ცოლ-ქმარს 30-მდე ძაღლი ჰყავდა დამწყვდეული და აწამებდა. ინფორმაცია ამის შესახებ მთავარმა არხმა გაავრცელა. მათივე ინფორმაციით, პოლიცია მეზობლებმა გამოიძახეს, თუმცა პოლიცია და ცხოველთა მონიტორინგის სამსახური მეპატრონეებმა სახლში არ შეუშვეს და ამიტომ კარის ამოჭრა გახდა აუცილებელი.

მეზობლების ინფორმაციით, უკვე სამი წელია მეპატრონე ცოლ-ქმარი ცხოველებს მძიმე პირობებში ამყოფებს. ამ დროისთვის კი ცხოველები თავშესაფარში არიან გადაყვანილები.

როგორც On.ge-ს შინაგან საქმეთა სამინისტროში განუცხადეს, ფაქტზე გამოძიება სისხლის სამართლის კოდექსის 259-ე მუხლით დაიწყო, რაც ცხოველის წამებას ან მისდამი სასტიკ მოპყრობას გულისხმობს. აღნიშნული მუხლი სასჯელის სახით ითვალისწინებს ჯარიმას ან შინაპატიმრობას ანდა თავისუფლების აღკვეთას 1 წლამდე ვადით.