საქართველოს საგარეო საქმეთა სამინისტროს ინფორმაციით, 23-25 თებერვალს დავით ზალკალიანი სიტყვით გამოვა ჟენევაში გაეროს ადამიანის უფლებათა საბჭოს მაღალი დონის სეგმენტზე, ასევე, ევროკავშირის ინიციატივით დაგეგმილ პანელზე — Good Human Rights Stories about Women Empowerment and Gender Equality.

უწყების განცხადებით, გაეროს ადამიანის უფლებათა საბჭოს სეგმენტზე მინისტრი განსაკუთრებულ ყურადღებას დაუთმობს საქართველოს ოკუპირებულ რეგიონებში ადამიანის უფლებების მხრივ არსებულ ურთულეს გარემოს. თუმცა, უცნობია რაზე ისაუბრებს ზალკალიანი გენდერული თანასწორობის საკითხისადმი მიძღვნილ პანელზე.

უწყებაში ხაზს უსვამენ იმ ფაქტს, რომ საქართველო ერთ-ერთია მსოფლიოს 15 სახელმწიფოს შორის, რომლებიც ევროკავშირმა გაეროსთან ერთად ადამიანის უფლებების დაცვის კუთხით მსოფლიოს საუკეთესო მაგალითებში შეიყვანა.

ღონისძიების მონაწილეებს სიტყვით მიმართავენ გაეროს გენერალური მდივანი ანტონიო გუტიერესი, გაეროს ადამიანის უფლებების უმაღლესი კომისარი მიშელ ბაშელე, ევროკავშირის სპეციალური წარმომადგენელი ადამიანის უფლებების საკითხებში ემონ გილმორი, ნორვეგიის, ინდონეზიის, კოლუმბიის საგარეო საქმეთა მინისტრები და სხვა.

გარდა ამისა, მინისტრი ორმხრივ შეხვედრებს გამართავს საერთაშორისო ორგანიზაციების ხელმძღვანელებთან. კერძოდ: გაეროს გენერალურ მდივანთან ანტონიო გუტიერესთან, ევროსაბჭოს გენერალურ მდივანთან მარია პეიჩინოვიჩ ბურიჩთან, ინტელექტუალური საკუთრების მსოფლიო ორგანიზაციის დირექტორთან ფრენსის გარისთან, გაეროს ლტოლვილთა უმაღლეს კომისართან ფილიპო გრანდისთან, ადამიანის უფლებათა საბჭოს პრეზიდენტთან ელიზაბეთ ტიჩი-ფისლბერგერთან. მინისტრი ასევე შეხვდება ფინეთის საგარეო საქმეთა მინისტრს პეკკა ჰაავისტოს, შვედეთის საგარეო საქმეთა მინისტრს ენ ლინდეს და მალდივების საგარეო საქმეთა მინისტრს აბდულა შაჰიდს.