პრემიერამდე ერთი თვით ადრე HBO-მ ერთ-ერთი ყველაზე ცნობილი სატელევიზიო შოუს, Westworld-ის მესამე სეზონის ტრეილერი გამოაქვეყნა.

"მე ამ სამყაროში დავიბადე და ჩემი პირველი მოგონება ტკივილია. ამ სამყაროში იყო ერთი ადგილი, რომლის ნახვის უფლებაც არ გვქონდა: შენი სამყარო", — ტრეილერში ეუბნება სერიალის ერთ-ერთი მთავარი გმირი, დოლორესი ახალ პერსონაჟს, კალებს, რომლის როლსაც Breaking Bad-ის ვარსკვლავი, აარონ პოლი ასრულებს.

ტრეილერიდან ვიგებთ, რომ Westworld-ის სახელით ცნობილი პარკის მცხოვრებლები, როგორც იქნა, რეალურ სამყაროს გაიცნობენ, თუმცა, როგორც ჩანს, ყველაფერი არც ისე მარტივად ჩაივლის.

"მათ გალიაში გამოგკეტეს და შენი ცხოვრება თავად დაგეგმეს. ზუსტად იგივე გამიკეთეს მეც", — ეუბნება დოლორესი აარონ პოლის პერსონაჟს. როცა კალები ეკითხება, საიდან იცოდა მან ეს, ხომ არ მითვალთვალებდიო, დოლორესმა მიუგო, რომ თავად არა, მაგრამ ვიღაც სხვა უყურებდა, "ვინც მისი მომავალი მოიპარა".

აღსანიშნავია, რომ ახალ სეზონში ვიხილავთ ვინსეტ კასელსაც, რომელიც, სავარაუდოდ, უარყოფითი პერსონაჟის როლს მოირგებს: ის ტენდი ნიუტონის გმირს, მეივის დოლორესის მოკვლას ავალებს. ახალი სეზონის სიუჟეტურ ხაზში დოლორესისა და მეივის დაპირისპირება, სავარაუდოდ, წამყვანი თემა იქნება.

ფოტო: HBO

კიდევ უფრო შთამბეჭდავ ვიზუალურ ეფექტებთან და მასშტაბურ სცენებთან ერთად, როგორც ჩანს, სიუჟეტის ხაზი მოულოდნელზე მეტად დაძაბული იქნება:

"ნამდვილი ღმერთები მოდიან და ისინი ძალიან გაბრაზებულები არიან", — ამბობს დოლორესი.

ისღა დაგვრჩენია, პრემიერის თარიღს, 15 მარტს დაველოდოთ და გავიგოთ, რა სიურპრიზებს გვიმზადებენ შოუს შემქმნელები.