ბოლო ერთი თვის განმავლობაში მთელი მსოფლიოს ყურადღება ჩინეთისკენაა მიმართული, რომელიც კორონავირუსის გავრცელების ძირითადი კერაა. ინფექციის გავრცელების არეალის ზრდასთან ერთად მუდმივად განახლებულ ინფორმაციას ვეცნობით: დღიურებს დაავადების ეპიცენტრიდან, ინფექციასთან მებრძოლი ექიმების მდგომარეობას თუ კრუიზში კარანტინში მოხვედრილი ათასობით მგზავრის ყოველდღიურ ცხოვრებას.

სულ ცოტა ხნის წინ ჩინურ სოციალურ ქსელ Weibo-ზე მოკლემეტრაჟიანი ფილმი გამოქვეყნდა, რომელიც ინფექციის გავრცელების ეპიცენტრში, ქალაქ უხანში არსებულ მდგომარეობას დოკუმენტური კადრებით ასახავს — 23 იანვრიდან ქალაქში კარანტინია გამოცხადებული და 14-მილიონიანი უხანის ქუჩები დაცარიელებულია, თითქოს, მოჩვენებების ქალაქად გადაიქცაო.

ფილმის ნახვა შეგიძლიათ ამ ლინკზე.

ფილმის გადამღები ჯგუფი უხანში იმყოფებოდა სხვა პროექტის გადაღებებზე, თუმცა კარანტინის გამოცხადების გამო ჯგუფის წევრები ამ ქალაქში აღმოჩდნენ გამომწყვდეულები და 23 იანვრიდან ერთი კვირის განმავლობაში პირადი ტელეფონების საშუალებით ქალაქის ცხოვრებას აღწერდნენ. საბოლოოდ კი მონტაჟის საშუალებით იშვიათი დოკუმენტური კადრები შეიკრა, რომლებიც იზოლირებული ქალაქის სიცოცხლეს, უფრო სწორად კი, უსიცოცხლობას გვაჩვენებს — დაცარიელებული ქუჩები, ჩუმი შენობები და უფუნქციო შუქნიშნები.

ფოტო: Sixth Tone

"ჩემი ჯგუფის წევრებს, რომლებიც უხანში იმყოფებიან, სურდათ, რომ რაღაც ღირებული გაეკეთებინათ. მათ აღბეჭდეს ის, რაც იქ ხდება. იზოლაციის შემდეგ ეს ამ ქალაქის იშვიათი პანორამული კადრებია. ვფიქრობ, რომ ეს ფილმი ძალიან მნიშვნელოვანია ისტორიისთვის", — განაცხადა ფილმის რეჟისორმა, ლან ბომ.

ფოტო: Sixth Tone

"არ დანებდე, უხან" — ამ მოწოდებით მთავრდება თითქმის ხუთწუთიანი ემოციური ფილმი.

ბოლო მონაცემებით კორონავირუსით მთელ მსოფლიოში დაახლოებით 72 000 ადამიანი ინფიცირებული, 1 900 კი დაღუპული.