ევროპული საქართველოს ერთ-ერთმა ლიდერმა, სერგი კაპანაძემ კახა კალაძეს ტვიტერის პოსტზე, სადაც საარჩევნო სისტემასთან დაკავშირებით დიალოგისთვის მზაობაზე წერს, დაუკომენტარა, რომ ოპოზიციას ისეთი წინადადება არ მოუსმენია, რომელიც პროპორციული სისტემის მომტანია.

"ოპოზიციის ლიდერები კვლავ ციხეში არიან, სხვების წინააღმდეგ კი აღძრულია საქმეები და ჩვენ არ მოგვისმენია წინადადება, რომელიც საქართველოს პროპორციულ სისტემას (ან მასთან მიახლოებულს) მოუტანს. ქართული ოცნება ისევ იმ აზრზეა, რომ 30%-იანი მხარდაჭერით უნდა მართოს ქვეყანა. ჩანს, რამდენად გულწრფელია შეთავაზება", — წერს კაპანაძე.

ქართული ოცნების გენერალურმა მდივანმა და თბილისის მერმა, კახა კალაძემ საკუთარ ტვიტერზე დაწერა, რომ პარტია ქართული ოცნება საარჩევნო სისტემასთან დაკავშირებით ოპოზიციასთან დიალოგისათვის მზადაა. აღნიშნულ პოსტზე კალაძემ დასავლელი პარტნიორები მონიშნა, მათ შორის: კონგრესში საქართველოს მეგობრობის ჯგუფის თავმჯდომარე ადამ კინზინგერი, სენატის საგარეო საქმეთა კომიტეტის თავმჯდომარე ჯიმ რიში და ევროპარლამენტის პოლიტიკური ჯგუფები.

"პარტია ქართული ოცნება მზადაა აწარმოოს მოლაპარაკებები ოპოზიციასთან, რათა შევთანხმდეთ ყველაზე მისაღებ საარჩევნო სისტემაზე 2020 წლის არჩევნებისთვის", — წერს კალაძე.