პარლამენტის პირველი ვიცე-სპიკერი, გია ვოლსკი ევროკავშირთან ასოცირების რეზოლუციის ჩავარდნას ეხმაურება და ამბობს, რომ საქართველო ევროპასთან ინტეგრაციის პროცესებში წინ არის წასული. მისი თქმით, ქართული დელეგაციის ვიზიტი სტრასბურგში წარმატებული იყო და საქართველოს პარლამენტის გინდა თუ ხელისუფლების შეფასებებში "უამრავი პოზიტივი" იყო.

როგორც ვოლსკი ამბობს, ევროკავშირთან ასოცირების რეზოლუცია იმიტომ ჩავარდა, რომ ოპოზიციის წევრებმა იმ "პოზიტივის გადაფარვა" სცადეს, რასაც საქართველოს მმართველმა ძალამ მიაღწია.

"ევროკომისიას სრული ინფორმაცია აქვს 7თებერვალს გაკეთებული და რეზოლუცია რამდენად წინ არის საქართველო ევროპასთან ინტეგრაციის პროცესებში. პრაქტიკულად არცერთი საკითხი არ აქვს დატოვებული დადებითი შეფასების გარეშე... პროექტი, რომელიც წარმოადგინა ევროკავშირმა იყო შესანიშნავი და ზუსტად ასახავდა იმ პროცესებს, რაც საქართველოში მიმდინარეობს. ზუსტად ასახავდა იმას, რასაც ჰქვია ევროპასთან ასოცირების პროცესის დახასიათება", — განაცხადა გია ვოლსკიმ.

13 თებერვალს ევროპარლამენტში ასოცირების ხელშეკრულებით გათვალისწინებული ერთობლივი რეზოლუცია ჩავარდა. საბოლოო ვერსიის მხარდასაჭერად ევროპარლამენტისა და საქართველოს პარლამენტის დეპუტატების უმრავლესობის მხარდაჭერა იყო საჭირო.

რეზოლუციის შესწორებები მოამზადეს მმართველი გუნდის წარმომადგენლებმა, ოპოზიციამ და, ასევე, ევროპარლამენტარების ნაწილმა. ქართულმა ოცნებამ სწორედ ოპოზიციის შესწორებებს არ დაუჭირა მხარი.