რუსეთის საგარეო საქმეთა სამინისტროს ოფიციალური წარმომადგენელი, მარია ზახაროვა აცხადებს, რომ სანამ საქართველოში შიდა ვითარება იმაზე იქნება დამოკიდებული ვინ ჩამოვა რუსეთიდან, პრობლემები იქნება. ამის შესახებ ზახაროვამ რადიო კომსომოლსკაია პრავდაში თინა კანდელაკთან ისაუბრა.

როგორც ზახაროვა ამტკიცებს, თბილისში ევროსაბჭოს მინისტერიალთან დაკავშირებით ხალხში სპეციალურად აჩენენ კითხვას "ჩამოვა თუ არა ლავროვი".

"ღმერთო ჩემო, ყველა ქართულმა მედიამ დამირეკა, ყველამ, თანაც რამდენჯერმე! მწერდნენ, მირეკავდნენ ამ საკითხთან დაკავშირებით. მე ვკითხე: თქვენს სახელმწიფოში შეგიძლიათ ამ ინფორმაციის გარეშე იცხოვროთ? თქვენ შეგიძლიათ იცხოვროთ მშვიდად, მოემზადოთ ამ ღონისძიებისთვის, რათა მიიღოთ შესაბამისი საერთაშორისო ფორუმი იმაზე ორიენტირების გარეშე, თუ ვინ ჩამოვა რუსეთიდან? თქვენ სუვერენულები ხართ, თქვენ დამოუკიდებლები ხართ", — განაცხადა ზახაროვამ.

მისივე თქმით, სუვერენულ სახელმწიფოში სხვა სახელმწიფოს წარმომადგენლის ჩამოსვლით ან არ ჩამოსვლით არაფერი არ უნდა იცვლებოდეს. როგორც ზახაროვა ამტკიცებს, წინააღმდეგ შემთხევაში პროვოკატორები თავიანთ ვიწროპოლიტიკურ ინტერესებს ატარებენ.

"ვიდრე შიდაპოლიტიკური, მნიშვნელობა არ აქვს, უბრალოდ ვითარება დამოუკიდებული იქნება თუ ვინ ჩამოვა რუსეთიდან და ვინ არა, პრობლემები იქნება. ეს უბრალოდ უნდა გადალახო... ვინმემ უნდა გაიგოსს, რომ საქართველო სუვერენული სახელმწიფოა და იმის მიხედვით, თუ ვინ ჩამოდის შენთან არ უნდა მოდიოდნენ და მიდიოდნენ მთავრობები, მინისტრები და ა.შ." — განაცხადა რუსეთის საგარეო უწყების წარმომადგენელმა.

საქართველომ, როგორც ევროპის საბჭოს მინისტრთა კომიტეტის თავმჯდომარე ქვეყანამ, მინისტერიალს 14-15 მაისს უნდა უმასპინძლოს. მინისტერიალის ფარგლებში შესაძლოა, რომ ქვეყანას რუსეთის დელეგაციის ისეთი წევრებიც ესტუმრონ, რომელთაც ოკუპირებული ტერიტორიების შესახებ კანონი აქვთ დარღვეული, მათ შორის შესაძლოა იყოს რუსეთის საგარეო საქმეთა მინისტრი სერგეი ლავროვიც.

28 იანვარს საქართველოს პრეზიდენტმა ევროსაბჭოს საპარლამენტო ასამბლეის ტრიბუნიდან განაცხადა, რომ ქვეყანა რუსეთის დელეგაციას უმასპინძლებს, თუნდაც ამისთვის კანონისთვის "გვერდის ავლა" გახდეს საჭირო. მისი თქმით, ქვეყანა "ქართულ სტუმართმოყვარეობას" გამოავლენს.

პრემიერ-მინისტრმა, გიორგი გახარიამ კი განაცხადა, რომ "ვერავინ საქართველოს კანონმდებლობას გვერდს ვერ აუვლის". როგორ აპირებს ამას, პრემიერს არ დაუკონკრეტებია.