14 თებერვალი მოახლოვდა და ჩვენი წარმატებული თუ წარუმატებელი სასიყვარულო ურთიერთობებიც იმეზე მეტად აქტუალური გახდა, ვიდრე წელიწადის ნებისმიერ სხვა დროს იქნებოდა.

პირდაპირ გეტყვით, ეს სტატია უფრო იმ ადამიანებისთვისაა განკუთვნილი, ვისაც წარსულში გული ატკინეს.

მოკლედ, თუ ჯერ კიდევ ყოფილ შეყვარებულზე ხართ გაბრაზებული, აშშ-ში, სან-ანტონიოს ზოოპარკი "რევანშის" უნიკალურ შესაძლებლობას გთავაზობთ.

საქმე ის არის, რომ ამ ზოოპარკს ჰყავს ტარაკნები, რომელთაც გარკვეული თანხის სანაცვლოდ ყოფილების სახელებს არქმევს და ვალენტინობაზე მათ "საზეიმო ვითარებაში" სხვა ცხოველებს აჭმევს.

“Cry Me a Cockroach” — ღონისძიება, რომელიც ამავე ზოოპარკის ფეისბუქზე დაანონსდა, მეტისმეტად გაბრაზებულ ადამიანებს იმის საშუალებასაც აძლევს, რომ სახელები გველებისთვის გამზადებულ თაგვებსაც შეურჩიონ.

ამ შემოთავაზების ყველაზე მიმზიდველი ნაწილი ის არის, რომ სულაც არაა აუცილებელი ადგილზე გამოცხადდეთ. ტარაკანს თქვენი ყოფილის სახელით მოიხსენიებენ იმ შემთხვევაშიც, თუ მომსახურების საფასურს, ტარაკნების შემთხვევაში $5, ხოლო თაგვებისთვის $20 ონლაინ გადაიხდით. კულმინაციას კი მარტივად, ფეისბუქის პირდაპირ ეთერში იხილავთ.

ამ ყველაფრის შემდეგ თუ კარგად დანაყრება მოგიდებათ კი აქვე შეგახსენებთ, რომ ვალენტინობაზე ამერიკული Burger King ყოფილების ფოტოებს უფასო ბურგერებში გადაგიცვლით.