ბრალდებული გამომძიებლის მარიანა ჩოლოიანის ადვოკატი, არჩილ შაბაშვილი მოითხოვს, რომ მისი დაცვის ქვეშ მყოფი აღკვეთის ღონისძიების გარეშე დარჩეს. მან თქვა, რომ შესაძლოა ალტერნატივის სახით გირაო დააყენოს, თუმცა ოდენობა ჯერ არ განუსაზღვრავთ. შესაბამისი შუამდგომლობის დაყენებას იგი დღეს, 12 თებერვალს წინასასამართლო სხდომაზე აპირებს.

"მტკიცებულებებს სასამართლო შეაფასებს, თუმცა ვიდეოფაილზე არსად არ ჩანს ზეწოლა. გამომძიებელს კომუნიკაცია ჰქონდა [ლუკა სირაძესთან] და ეს ჩანს, თუმცა ფიზიკურად შეხებას... საუბარი ხომ არ ისმის ვიდეოში? აქედან გამომდინარე ამ ვიდეოფაილზე დაყრდნობა საკმარისი არაა", — თქვა ადვოკატმა.

პროკურორი ლევან ქუთათელაძე აღნიშნავს, რომ მტკიცებულებებს შორის, მათ აქვთ არამხოლოდ ვიდეოფაილი, არამედ პირების ჩვენებები, მათ შორის, დაზარალებულის უფლებამონაცვლის, პოლიციელებისა და სხვა ნეიტრალური პირების:

"აქცენტი მაქვს ნეიტრალურ მოწმეებზე, რომელთა ჩვენებები ცალსახად ადასტურებენ რომ მარიანა ჩოლოიანის მიერ ჩადენილ იქნა ჩვენების იძულების ორი ეპიზოდი".

დღევანდელ სხდომაზე მარიანა ჩოლოიანისთვის მტკიცებულებათა დასაშვებობაზე და აღკვეთის ღონისძიების გადახედვაზე იმსჯელებენ.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.

მარიანა ჩოლოიანის საქმე სახელმწიფო ინსპექტორის სამსახურმა განსახილველად საქალაქო სასამართლოში გადაგზავნა.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, მარიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.