რა პროცედურებს გაივლის მეცხრე მოწვევის პარლამენტი

ცესკოს წინასწარი მონაცემებით, საქართველოს პარლამენტი უკვე დაკომპლექტებულია. 150 მანდატიდან 115-ის მიღებით ქართულმა ოცნებამ საკონსტიტუციო უმრავლესობა მოიპოვა.

რა პროცედურებს გაივლის ახლადარჩეული, მეცხრე მოწვევის, პარლამენტი, რისი უფლება არ აქვს პარლამენტარს და რას გულისხმობს მისთვის მინიჭებული იმუნიტეტი - ამ კითხვებზე On.ge-ს სამართლიანი არჩევნების იურისტმა ნინო რიჟამაძემ უპასუხა.

ნინო რიჟამაძე, იურისტი.

ფოტო: რადიო თავისუფლება

"საქართველოს კონსტიტუციის 51-ე მუხლის თანახმად, ახლადარჩეული პარლამენტის პირველი სხდომა არჩევნებიდან 20 დღის განმავლობაში უნდა გაიმართოს. მის მოწვევის თარიღს პრეზიდენტი ნიშნავს.

პარლამენტის მოწვევისთვის, საჭიროა, პარლამენტის წევრთა 2/3-ის უფლებამოსილება ცნობილი იყოს, თუ გავითვალისწინებთ იმას, რომ ცესკო არჩევნების შედეგებს არაუგვიანეს კენჭისყრის დღის მე-19 დღისა აჯამებს, ახალი პარლამენტის მოწვევა მოხდება დაახლოებით - 19-20 ნოემბერს" - ამბობს On.ge-სთან საუბრისას სამართლიანი არჩევნების იურისტი ნინო რიჟამაძე.

ახლადარჩეული პარლამენტი პირველივე სხდომაზე ირჩევს პარლამენტის თავმჯდომარეს, შემდეგ აყალიბებს კომიტეტის შემადგენლობებს და ირჩევს მათ თავმჯდომარეებს.

შეგახსნებთ, რომ 2030-ის ინფორმაციით, პარლამენტის თავმჯდომარის თანამდებობას ირაკლი კობახიძე დაიკავებს და ეს გადაწყვეტილება ქართულ ოცნებაში უკვე მიღებულია.

სანამ პარლამენტის საპროცედურო საკითხთა კომიტეტი ჩამოყალიბდება, საკანონმდებლო ორგანოში მანამდე შეიქმნება სამანდატო კომისია, რომელიც ხმის დათვლის და კენჭისყრის პროცედურებს ასრულებს.

პარლამენტის წევრის დაკავება ან დაპატიმრება, მისი ბინის, მანქანის, სამუშაო ადგილის ან პირადი გაჩხრეკა შეიძლება მხოლოდ პარლამენტის თანხმობით.

კონსტიტუციის თანახმად, პარლამენტის წევრს უფლება არ აქვს ეკავოს რაიმე თანამდებობა სახელმწიფო სამსახურში ან ეწეოდეს სამეწარმეო საქმიანობას, თუმცა არსებობს გამონაკლისი სამეცნიერო-პედაგოგიური საქმიანობის სახით.

კითხვაზე, რას გულისხმობს იმუნიტეტი, რომელსაც კანონმდებელს საპარლამენტო საქმიანობა ანიჭებს, სამართლიანი არჩევნების იურისტმა გვიპასუხა, რომ პარლამენტის წევრის დაკავება ან დაპატიმრება, მისი ბინის, მანქანის, სამუშაო ადგილის ან პირადი გაჩხრეკა შეიძლება მხოლოდ პარლამენტის თანხმობით:

"გამონაკლისია დანაშაულზე წასწრების შემთხვევა, რაც დაუყოვნებლივ უნდა ეცნობოს პარლამენტს. თუ პარლამენტი არ მისცემს თანხმობას, პარლამენტის დაკავებული ან დაპატიმრებული წევრი დაუყოვნებლივ უნდა გათავისუფლდეს. ასევე, პარლამენტის წევრს უფლება აქვს ჩვენება არ მისცეს იმ ფაქტის შესახებ, რომელიც მას გაანდეს, როგორც პარლამენტის წევრს. დაუშვებელია ამის გამო მისი ფოსტის ან წერილობითი მასალების დაყადაღება".

ცესკოს წინასწარი მონაცემებით: