პარლამენტის ყოფილი ვიცე-სპიკერი და დამოუკიდებელი დეპუტატი, თამარ ჩუგოშვილი ამბობს, რომ უგულავას დაკავებამ სამთავრობო დელეგაციის ვიზიტისას აშშ-დან წამოსული "პოზიტიური იმპულსებიც ჩაკლა". მისი თქმით, შეუძლებელია უგულავას დაკავების სამართლებრივი ახსნა და რამდენი სამართლებრივი დასკვნაც არ უნდა დაწერონ, მათ აღარავინ "გამოყვება".

როგორც ჩუგოშვილი ამბობს, აღმოჩნდა, რომ პარტნიორებთან სამთავრობო დელეგაციის ვიზიტებს "აზრი არ აქვს".

"მგონი გუშინწინ გამოვიდნენ ამ ოთახიდან პარლამენტის თავმჯდომარე და საგარეო საქმეთა მინისტრი. თუ მაინც ვერ ახერხებენ ინფორმირებას, რა ვიცი ახლა, სასაცილოა უკვე ამაზე ლაპარაკი. შენ შეიძლება ილაპარაკო, მაგრამ თუ არავინ არ გეთანხმება და არ იზიარებს ამ ლაპარაკს, რა აზრი აქვს? წესით ძალიან უხერხულ მდგომარეობაში უნდა იყოს ახლა, ნამდვილად არ ვისურვებდი მის [არჩილ თალაკვაძის] ადგილზე ყოფნას. ეს თავისმოჭრა არის იმ ხალხთან, ვისაც ელაპარაკები, პირობებს აძლევ და შემდგომ ფეხი არ დაგიდგამს ჩვენს ქვეყანაში და უცებ ასეთი რამ წამოგეწევა უკან", — განაცხადა ჩუგოშვილმა TV პირველის ეთერში.

საქართველოს დელეგაციის ვიზიტი აშშ-ში მას შემდეგ დაიგეგმა, რაც ბოლო თვეების განმავლობაში შტატებიდან ხელისუფლებამ რამდენიმე კრიტიკული წერილი მიიღოს. წერილებში კრიტიკის მიზეზად ბოლოდროინდელ მოვლენები სახელდებოდა, რომლებმაც აშშ-სთან საერთო ღირებულებების არსებობაზე კითხვები გააჩინა.

აშშ-ის სენატის საგარეო ურთიერთობათა კომიტეტის თავმჯდომარე, ჯიმ რიში გიგი უგულავას დაკავების ფაქტს ეხმაურება და ამბობს, რომ "იმედგაცრუებულია". ამის შესახებ სენატორმა ტვიტერზე დაწერა. გიგი უგულავას დაკავებას ამერიკელი კონგრესმენი, ადამ კინზინგერიც გამოეხმრაურა და თქვა, რომ სასამართლოს იარაღად გამოყენება დემოკრატიაა არაა.

უზენაესმა სასამართლომ 10 თებერვალს გიგი უგულავას პატიმრობა შეუფარდა. ოპოზიციის ლიდერი შინაგან საქმეთა სამინისტროში თვითონ მივიდა. უგულავას თქმით, ციხეში მესამედ მიდის და მიაჩნია, რომ იქ თავისუფლება არ ეზღუდება, პირიქით საქართველოში ციხეა თავისუფლების ადგილი.

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".