დაავადებათა კონტროლის ცენტრის ყოველდღიურ ბრიფინგზე გაიხსენეს ექიმი, რომელმაც პირველმა ატეხა განგაში კორონავირუსზე და თავადაც ამ ვირუსით გარდაიცვალა. ქართველმა ექიმებმა და ჟურნალისტებმა ლი ვენლიანგს წუთიერი დუმილით პატივი მიაგეს.

ჩინელი ექიმი, ლი ვენლიანგი, რომელიც საზოგადოებას დეკემბერში აფრთხილებდა "კორონავირუსის მსგავსი" დაავადების გავრცელების საფრთხეზე, გუშინ, 6 თებერვალს გარდაიცვალა. მას პაციენტისგან გადაედო დაავადება.

განგაშის ატეხვისას ექიმი ლი ადგილობრივმა ხელისუფლებამ გამოკითხა და პოლიციაშიც კი დაიბარეს, სადაც ხელწერილი დააწერინეს "ინტერნეტ სივრცეში ჭორების გავრცელებასა" და "წესრიგის დარღვევაზე". ექიმი 12 იანვარს მოათავსეს საავადმყოფოში, პირველ თებერვალს კი დაუდგინდა კორონავირუსის დიაგნოზი.

ექიმის დაღუპვას ტვიტერზე გამოეხმაურა ჯანდაცვის მსოფლიო ორგანიზაცია. ისინი მწუხარებას გამოთქვამენ ექიმი ლის გარდაცვალების გამო და აღნიშნავენ იმ დიდ საქმეს, რაც მან გასწია დაავადების წინააღმდეგ.

რატომ ატეხა განგაში ექიმმა ლიმ

ვუჰანში მცხოვრები 34 წლის ოფთალმოლოგმა ერთი თვის შემდეგ თავის საიტზე, Weibo-ზე დაწერა მისი ისტორია:

დეკემბერში ექიმმა შეამჩნია შვიდი იდენტური შემთხვევა, რომელიც ძალიან ჰგავდა "ძველ კორონავირუსს" (Sars — მწვავე რესპირატორული სინდრომი). ის 2003 წელსაც გლობალურად გავრცელდა.

ექიმს სურდა, კორონავირუსის საფრთხეზე სხვებიც გაფრთხილება. 30 დეკემბერს მან შეტყობინება გაუგზავნა კოლეგა ექიმებს, დაინფიცირების თავიდან ასაცილებლად ჩაეცვათ დამცავი სკაფანდრი. ოთხი დღის შემდეგ იგი უსაფრთხოების ბიუროში დაიბარეს, სადაც "ტყუილში" დაადანაშაულეს. ექიმი ლი იყო ერთ-ერთი იმ რვა ადამიანიდან, რომლებიც პოლიციამ "ჭორების გავრცელებაში" დაადანაშაულა. ადგილობრივმა ხელისუფლებამ ექიმს მოგვიანებით მოუბოდიშა.

ჩინეთში ახალი კორონავირუსით დაღუპულთა რიცხვი 563-მდე გაიზარდა, ვირუსით დაავადებულთა რაოდენობა კი 28 ათასს აჭარბებს.