პარლამენტის ყოფილი თავმჯდომარე და უმრავლესობის წევრი, ირაკლი კობახიძე ამტკიცებს, რომ ქართული ოცნების შიდა კვლევებით პარტიას 2016 წლის საპარლამენტო არჩევნებთან შედარებით, დღეს "უფრო ძლიერი სასტარტო პოზიცია" აქვს. მისი თქმით, ეს მმართველ გუნდს აძლევს იმის პროგნოზირების საშუალებას, რომ 50%-იან ნიშნულს გადასცდებიან.

როგორც კობახიძე ამბობს, საზოგადოების განწყობის ერთ-ერთი განმაპირობებელი ორპოლუსიანი პოლიტიკური გარემოა, სადაც ამომრჩეველი ქართულ ოცნებას ირჩევს.

"2016 წლის იანვარში, არჩევნებამდე რომ ჩავატარეთ კვლევა, მაშინ სასტარტო პოზიცია გვქონდა ბევრად უფრო სუსტი, ვიდრე გვაქვს დღეს. მაშინ 49%-ით დავასრულეთ 2016 წელს არჩევნები. საზოგადოების განწყობა არის ასეთი და ეფუძნება სხვადასხვა ფაქტორს. სამწუხაროდ, ერთ-ერთი ფაქტორი არის პოლარიზაციის მაღალი ხარისხი. ქართული ოცნება და ნაციონალური მოძრაობა არის ორი პოლუსი, რომელსაც ხედავს საზოგადოება. ბუნებრივია, საზოგადოების უდიდესი ნაწილი არჩევანს ამ ორ პოლუსს შორის აკეთებს ქართული ოცნების სასარგებლოდ", — განაცხადა კობახიძემ პალიტრანიუსის ეთერში.

მისივე თქმით, მმართველი გუნდის ამოცანაა, რომ არჩევანი არა მარტო პოლარიზაციის გამო გაკეთდეს, არამედ იმით, რომ საზოგადოებამ დაინახოს ის "ნახტომი", რომელიც 2012 წლიდან "ყველა სფეროშია".