აჭარის უმაღლესი საბჭოს დეპუტატმა, მერაბ ბლადაძემ დაიფიცა, რომ ფიზიკურად იძალადებს ოპოზიციის მხარდამჭერებსა და აქტივისტებზე, თუ "სირცხვილის დერეფნების მოწყობას" გაბედავენ. პირად ფეისბუქგვერდზე მან დაწერა, რომ ასეთ ხალხს "თავს გაუტეხავს", თუნდაც ამის გამო მანდატის დატოვება მოუწიოს.

On.ge-სთან საუბარში ის ადასტურებს, რომ პოსტი თავად დაწერა. მუქარა დეპუტატმა იმით განმარტა, რომ "ისე არ ცხოვრობს, ეს რომ აკადრონ".

ამ პოსტით ბლადაძე დღეს, 5 თებერვალს ბათუმში გამართულ საპროტესტო აქციას გამოეხმაურა, რომლითაც უმაღლესი საბჭოს დეპუტატებს "სირცხვილის დერეფნები" მოუწყეს.

მერაბ ბლადაძე უმაღლეს საბჭოში 2019 წელს პატრიოტთა ალიანსის პროპორციული სიით მოხვდა, თუმცა მოგვიანებით მან პარტია დატოვა და ახლა დამოუკიდებელი დეპუტატია.