ადამიანთა უფლებების ცენტრის ხელმძღვანელის, ალეკო ცქიტიშვილის განცხადებით, საპარლამენტო არჩევნების მეორე ტურში ძირითადი დარღვევები, რომლებიც დამკვირვებლებმა დააფიქსირეს, პროცედურული და ტექნიკური ხასიათისაა, რაც კომისიის წევრთა არაკვალიფიციურობამ გამოიწვია.

მან აღნიშნა, რომ პირველი ტურის შემდეგ ეს ტენდენცია უცვლელია: "საარჩევნო ადმინისტრაციის არაპროფესიონალიზმი შემაშფოთებელია და ჩრდილს აყენება არჩევნების მიმდინარეობას".

ალეკო ცქიტიშვილმა ისაუბრა მარნეულის უბნებში არსებულ დარღვევებზე. მისი განცხადებით, ყველაზე რთული სიტუაცია 48-ე და 50-ზე საარჩევნო უბნებზე იყო:

"48-ე უბანზე იყო მარკირება გავლილი ამომრჩევლების შეღწევის მცდელობები, როგორც დამკვირვებელი გვატყობინებს ათობით ასეთი ადამიანი დათვალა, თუმცა ეს ადამიანები ძირითადად უკან გააბრუნეს და არ მისცეს უფლება, უბანზე შესულიყვნენ. თუმცა ორი ადამიანი მაინც მოხვდა უბანზე და მათ მისცეს ხმა".


ალეკო ცქიტიშვილის განცხადებით მშვიდ და სამართლიან გარემოში წარიმართა საარჩევნო პროცესი პანკისის ხეობაში, სადაც მცირე დარღვევები დაფიქსირდა.

ადამიანის უფლებათა ცენტრის დამკვირვებლები წარმოდგენილი იყვნენ საქართველოს სამ რეგიონში - შიდა ქართლში და კონფლიქტისპირა სოფლებში, ქვემო ქართლსა და კახეთის რეგიონის ეთნიკურ უმცირესობებით დასახლებულ სოფლებში.