ახალგაზრდა იურისტთა ასოციაციის წარმომადგენლის, ანა ნაცვლიშვილის განცხადებით, 6 საათის მონაცემებით, საარჩევნო უბნებზე დაფიქსირდა დარღვევები გადასატან ყუთებთან და სიებთან დაკავშირებით.

გარდა ამისა, მარკირება გავლილი ამომრჩევლები ხმის მიცემას ცდილობდნენ, თუმცა კომისიის თავმჯდომარემ ეს დარღვევა აღკვეთა. საიას განცხადებით, სადამკვირვებლო ორგანიზაცია მწვანე დედამიწის წარმომადგენლები გამოდიოდნენ ინიციატივით, რომ მარკირება გავლილ ამომრჩევლებს ხმის მიცემის უფლება ჰქონოდათ. ნაცვლიშვილმა ისაუბრა პრობლემებზე, რომელიც საიას დამკვირვებლებს შეექმნათ:

"კირვალის 47-ე უბანზე ჩვენს დამკვირვებელს სიტყვიერი შეურაცხყოფა მიაყენა მოქალაქემ. ზოგადად ამ უბანზე ჩვენს დამკვირვებელს დღის განმავლობაში ჰქონდა გარკვეული პრობლემები, რომელიც უზღუდავდა მას უფლებამოსილების განხორციელებას".

საიამ განიხილა დღეს ამომრჩევლისთვის დაგზავნილ სააგიტაციო შეტყობინებები:

"მნიშვნელოვანია, რომ ეს საკითხი იქნეს შესწავლილი. ერთი მხრივ, აქ შეიძლება ადგილი ჰქონდეს პერსონალური მონაცემების არასათანადოდ დამუშავებას, მეორე მხრივ, მნიშვნელოვანია, რომ აუდიტის სამსახურმა ყურადღება მიაქციოს ამ სმს შეტყობინებების გაგზავნის ფინანსურ ნაწილს და შეამოწმოს რამდენად სწორად და კანონიერად ხდება აღნიშნული მოქმედება".

ანა ნაცვლიშვილის განცხადებით, უბნებზე ადგილი აქვს ამომრჩევლების აღრიცხვას:

"დაფიქსირდა შემთხვევა ზუგდიდის 72-ე უბანზე, როცა კენჭისყრის შენობაში ქართული ოცნების და სადამკვირვებლო ორგანიზაცია ადვოკატთა და იურისტთა საერთაშორისო ობსერვატორიის წარმომადგენლები აწარმოებენ უბანზე მისული ამომრჩევლის აღრიცხვას, ლურჯად აღნიშნავენ ოცნების მომხრეებს, ყვითლად ნაციონალური მოძრაობის მომხრეებს და სხვა ფერად ვისაც არ ჰქონდა გადაწყვეტილი ვის მიცემდა ხმას. აღსანიშნავია, რომ ეს პირები მისულ ამომრჩეველს ეკითხებიან და ამოწმებენ, ხომ არ შეუცვლიათ მათ თავიანთი არჩევანი".

ნაცვლიშვილმა ჟურნალისტების კითხვაზე მთაწმინდის უბანზე გატაცებულ გადასატან ყუთთან დაკავშირებით აღნიშნა, რომ საია ამ ეტაპზე ინფორმაციას არ ფლობს.