გენერალური პროკურორობის კანდიდატი და ყოფილი გენერალური პროკურორი, ირაკლი შოთაძე ამბობს, რომ მის მიმართ კრიტიკა პოლიტიკური ჯგუფებისგან ისმის და ეს "ცალსახა სიცრუეა". ამის შესახებ შოთაძემ საპროკურორო საბჭოში გასაუბრების დროს ისაუბრა.

"კრიტიკა ჩემთვის არის მოტივატორი, კიდევ უფრო კარგად ვაკეთო ჩემი საქმე, ვემსახურო ჩემს ქვეყანას და ხალხს", — გენერალური პროკურორობის მსურველმა.

ყოფილი მთავარი პროკურორის, ირაკლი შოთაძის გასაუბრების პარალელურად, პროკურატურასთან საპროტესტო აქცია იმართება. არასამთავრობო ორგანიზაცია ადამიანის უფლებათა ცენტრის წარმომადგენლები აპროტესტებენ იმ ფაქტს, რომ შოთაძეს ისევ სურს უწყების მართვა, რომელიც თავადვე დატოვა.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.