ატლანტიკური საბჭოს ვიცე-პრეზიდენტი, ბათუ ქუთელია მმართველ გუნდს პასუხობს და ამბობს, რომ ის არცერთი პარტიის წევრია და არც რაიმე სახის მოლაპარაკებებში წარმოადგენს რომელიმე პოლიტიკურ ჯგუფს. ამის შესახებ ქუთელიამ საკუთარ ფეისბუქზე დაწერა.

როგორც ბათუ ქუთელია განმარტავს, ის ამერიკულ ლობისტურ კომპანია, ორიონ სტრატეჯის ანალიტიკურ მომსახურეობას უწევს.

"ჩემი პროფესიული საქმიანობის ერთ-ერთი მნიშვნელოვანი ნაწილია ანალიტიკური პროდუქტების შექმნა და შესაბამისი მომსახურეობის გაწევა დაინტერესებული უცხოური კომპანიებისათვის. ამჟამად ვმუშაობ რამოდენიმე ამერიკულ კომპანიასთან და მათი ინტერესებიდან გამომდინარე ჩემი ანალიტიკური პროდუქტები არის პოლიტიკური, ეკონომიკური, უსაფრთხოების თუ სხვა პროფილის. ერთ-ერთი ასეთი კომპანიაა ორიონ სტრატეჯი. ყველა ეს საქმიანობა არის ღია და გამჭვირვალე ამერიკული კანონმდებლობით. საზოგადოებრივი ინტერესებიდან გამომდინარე ორიონ სტრატეჯი გააკეთებს დამატებით განმარტებებს", — წერს ქუთელია.

მთავრობასა და ლობისტებზე ინფორმაციის გავრცელების შემდეგ ქართულმა ოცნებამ ერთიანი ნაციონალური მოძრაობის მსგავს კავშირებზე დაიწყო საუბარი. ეს ყველაფერი დროში დაემთხვა ქართული ოცნების ლობისტურ კომპანიასთან ხელშეკრულების განახლებას, რომელიც გუშინ, 2 თებერვალს გასაჯაროვდა.

მმართველი პარტიის ლიდერმა, მამუკა მდინარაძემ დღეს, 3 თებერვალს გამართულ ბრიფინგზე თქვა, რომ ერთიან ნაციონალურ მოძრაობას ლობისტურ კომპანიასთან ბათუ ქუთელია ხელმძღვანელობს. მან ბრიფინგზე შესაბამისი დოკუმენტიც წარმოადგინა. მდინარაძის თქმით, ბათუ ქუთელიას შუამდგომლობა იმის დადასტურებაა, თუ როგორ მივიდა ნაციონალური მოძრაობა "სისტემური დანაშაულიდან" "სისტემურ მანიპულაციამდე".

ნაციონალური მოძრაობა ლობისტებთან კავშირს არ უარყოფს, თუმცა ამბობს, რომ დოკუმენტის ხელმომწერი მათი ხელისუფლების დროს ერთ-ერთი ლიდერი, ბათუ ქუთელია არაა.