დღეს, 10 მაისს, თბილისის საქალაქო სასამართლოსთან თეთრი ხმაურის მოძრაობამ ლაშა ბახუტაშვილის მხარდამჭერი აქცია გამართა და ქვეყანაში არსებული ნარკოპოლიტიკა გააპროტესტა.

ტრანსპარანტებით "შეწყდეს უდანაშაულო ხალხის დევნა", "შეწყდეს ძალადობრივი პოლიტიკა", "0,00009 გრამისთვის 5-8 წლამდე პატიმრობა?" და ა.შ. აქტივისტებმა სოლიდარობა გამოუცხადეს ლაშა ბახუტაშვილს, რომელიც 2013 წელს დააკავეს და 0,00009 გრამი ნარკოტიკული ნივთიერება დეზომორფინის აღმოჩენის გამო მას 5-დან 8 წლამდე თავისუფლების აღკვეთა ემუქრება.

საქმე ეხება საქართველოს სისხლის სამართლის კოდექსის 260-ე მუხლის მესამე ნაწილის ა ქვეპუნქტს, რომელიც გულისხმობს ნარკოტიკული საშუალების უკანონო შენახვას განსაკუთრებით დიდი ოდენობით.

აქციის მონაწილეების თქმით, დეზომორფინს კანონმდებლობით მცირე ოდენობა განსაზღვრული არ აქვს, შესაბამისად ის რაოდენობა, რაც ლაშა ბახუტაშვილს აღმოუჩინეს, დიდ ოდენობად მიიჩნევა.

ლაშა ბახუტაშვილის ადვოკატმა ნინო გელაშვილმა თქვა, რომ აქციის მიზანი ნარკოპოლიტიკის შერბილებაა:

"საქართველოში უმკაცრესი ნარკოპოლიტიკაა. ლაშა ბახუტაშვილს 0,00009 გრამი დეზომორფინი აღმოუჩინეს და ამის გამო მისი 5-დან 8 წლამდე თავისუფლების აღკვეთა არის არაგონივრული, არალოგიკური და არაკონსტიტუციური".

აქციას შეუერთდნენ პარტიზანი მებაღეებიც, რომლებიც თბილისის საქალაქო სასამართლოს ეზოში ნატა ფერაძის სასამართლო პროცესის დაწყებას ელოდებოდნენ.