საერთაშორისო გამჭვირვალობა — საქართველოს (TI) ინფორმაციით, მაჟორიტარი დეპუტატის, ენზელ მკოიანისა და მისი ოჯახის წევრების კომპანიებმა 2010-2019 წლებში ბიუჯეტიდან 2 312 278 ლარი მიიღეს. ორგანიზაციის განცხადებით, მკოიანის შვილების, ძმისა და ბიძის სამ კომპანიასთან საწვავის შესყიდვაზე 674 სახელმწიფო შესყიდვა გაფორმდა, მათ შორის 665 პირდაპირი წესით.

ფოტო: საერთაშორისო გამჭვირვალობა — საქართველო

TI-ს ინფორმაციით, თავად ენზელ მკოიანიც მაჟორიტარული ბიუროსთვის საწვავს მხოლოდ ოჯახის კომპანიიდან ყიდულობს. კერძოდ, ოთხ წელში გაფორმებული 34 პირდაპირი შესყიდვით, ბიურომ შპს-ს 78 339 ლარი გადაურიცხა. მათივე ინფორმაციით, აქედან 49 000 ლარის ღირებულების ხელშეკრულებები დეპუტატმა კომპანიის დირექტორთან, საკუთარ ბიძასთან პირადად გააფორმა.

ორგანიზაციის განცხადებით, ენზელ მკოიანის ძმა და ბიძა, მარტუნ და ნორაირ მკოიანები ხელისუფლებაში მყოფი პარტიების მსხვილი შემწირველები არიან. მათივე თქმით, როცა ხელისუფლების სათავეში ნაციონალური მოძრაობა იყო, პარტიას 115 000 ლარი შესწირეს, ქართული ოცნების უმრავლესობაში მოსვლის შემდეგ კი ჯამში 213 000 ლარით მისი შემწირველები გახდნენ.

საერთაშორისო გამჭვირვალობა მოუწოდებს სახელმწიფო უსაფრთხოების სამსახურის ანტიკორუფციულ სააგენტოსა და გენერალურ პროკურატურას, შეისწავლოს მკოიანის ოჯახის კომპანიების, შპს მეეკისა და შპს ეს ჯი გაზ — კომპანის თითოეული სახელმწიფო შესყიდვა და დაადგინოს, ხომ არ იყო ეს შესყიდვები მათთვის სასურველ პირობებში გამოცხადებული და იკვეთება თუ არა კორუფციის შესაძლო კონკრეტული ნიშნები.

ენზელ მკოიანი 20 წელია საქართველოს პარლამენტის წევრია. ის ოთხჯერ ნინოწმინდის მაჟორიტარი დეპუტატად აირჩიეს, ბოლოს, მეხუთედ კი ახალქალაქი-ნინოწმინდის მაჟორიტარულ ოლქში ქართულ ოცნებას წარადგენდა.