პრემიერ-მინისტრის, გიორგი გახარიას მტკიცებით, ევროსაბჭოს მინისტერიალის ფარგლებში რუსეთის დელეგაციის შემოსვლაზე "კანონის შესაბამისად" იმოქმედებენ. ის გამოეხმაურა პრეზიდენტის განცხადებასაც და აღნიშნა, რომ "ვინც არ უნდა" გასცეს მსგავსი დაპირება, საქართველოს კანონმდებლობას "ვერავინ აუვლის გვერდს".

"ერთმნიშვნელოვნად გეტყვით, რომ მსგავსი გადაწყვეტილებები მიიღება საქართველოს კანონმდებლობის შესაბამისად, ყველა შემთხვევაში, აი, ამ შემთხვევაშიც...

ხაზგასმით აღვნიშნავ, ვერავინ, ვინც არ უნდა განაცხადოს ეს, საქართველოს კანომმდებლობას გვერდს ვერ აუვლის. მოვა ის დროც და ყველაფერი გაკეთდება საქართველოს კანონმდებლობის სრული შესაბამისობით", — განაცხადა მან.

ევროსაბჭოს საპარლამენტო ასამბლეაზე პრეზიდენტმა, სალომე ზურაბიშვილმა განაცხადა, რომ საქართველო ოკუპაციის შესახებ კანონის გვერდის ავლით აპირებს, რუსეთის დელეგაციის ისეთ წევრებს უმასპინძლოს, რომელთაც შესაძლოა ეს კანონი დარღვეული ჰქონდეთ. ზურაბიშვილმა რუს დეპუტატს უთხრა, რომ "რუსეთის პოლიტიკისგან განსხვავებით, საქართველოში საერთაშორისო ვალდებულებებს პატივს სცემენ" და ამ ვალდებულებების გამო ეროვნული კანონმდებლობისთვის გვერდის ავლას აპირებენ.

"ეს არ არის მარტივი. ამას მოსახლეობა მარტივად არ მიიღებს, თუმცა ჩვენ ამის გაკეთებას ვაპირებთ, რადგან ვიცავთ ჩვენს პრინციპებსა და ამ ორგანიზაციის წინაშე ნაკისრ ვალდებულებებს", — განაცხადა სალომე ზურაბიშვილმა.

პრეზიდენტის განცხადებას სამოქალაქო საზოგადოებასა და ოპოზიციაში პროტესტი მოყვა.

რა წერია კანონში ოკუპაციის შესახებ

ოკუპირებულ ტერიტორიებზე განსაკუთრებული სამართლებრივი რეჟიმი ვრცელდება, რომლის მიხედვითაც უცხო ქვეყნის მოქალაქეებისათვის და მოქალაქეობის არმქონე პირებისათვის ოკუპირებულ ტერიტორიებზე შესვლა დაშვებულია მხოლოდ:

• აფხაზეთის ავტონომიური რესპუბლიკის ტერიტორიებზე — ზუგდიდის მუნიციპალიტეტის მიმართულებიდან;
• ცხინვალის რეგიონში (ყოფილი სამხრეთ ოსეთის ავტონომიური ოლქის ტერიტორიებზე) — გორის მუნიციპალიტეტის მიმართულებიდან.

ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და ისჯება საქართველოს სისხლის სამართლის კოდექსით.

კანონი ითვალისწინებს "განსაკუთრებულ შემთხვევებსაც". კერძოდ, შეიძლება გაიცეს ოკუპირებულ ტერიტორიაზე აკრძალული მიმართულებებიდან შესვლის სპეციალური ნებართვა (საქართველოს მთავრობის სამართლებრივი აქტით დადგენილი წესით), თუ ეს ემსახურება საქართველოს სახელმწიფო ინტერესებს, კონფლიქტის მშვიდობიანი მოგვარების, დეოკუპაციის, ომით დაზარალებულ მოსახლეობას შორის ნდობის აღდგენის ან ჰუმანიტარულ მიზნებს.