ქართული ოცნების დეპუტატი თბილისის საკრებულოდან, ბექა დავითულიანი ოპოზიციონერი დეპუტატის, ლევან ხაბეიშვილის ცემას ნაწილობრივ ამართლებს. მისი თქმით, ვინმეს რომ იდიოტს, ფარჩაკს და არაკაცს დაუძახებს, მისგან საპასუხო რეაქციასაც დაელოდება:

"ადამიანები ვართ და ზოგი სიტყვიერად აყენებს ერთმანეთს შეურაცხყოფას და ზოგი ფიზიკურად. ორი წელია ეს ადამიანი ყველაფერს შვება იმისათვის, რომ აქამდე მიიყვანოს ხალხი. ფიზიკურს რა თქმა უნდა და არც სიტყვიერს გამართლება არ აქვს, მაგრამ ხდება ხანდახან".

დღეს, 24 იანვრის ბიუროს სხდომის დროს საკრებულოში ნაციონალური მოძრაობის დეპუტატს, ლევან ხაბეიშვილს სცემეს. ინციდენტის კადრებში ჩანს, რომ დეპუტატს ქართული ოცნების რამდენიმე დეპუტატმა სცემა. ხაბეიშვილის თქმით, იგი სატელევიზიო ეთერით კორუფციაზე საუბრის გამო სცემეს.

"ერთი ერთზე ვერ მერევიან, მაგრამ ათნი მერევიან... ვერ წამაქციეს, ვერ წამაქცევენ... კალაძის დავალება იყო, მაჩვენეთ ეგ ბიჭი დაალურჯეთო. ესენი ლაჩრები არიან და შეასრულეს", — ამბობს ხაბეიშვილი ჟურნალისტებთან.

შინაგან საქმეთა სამინისტრომ თბილისის საკრებულოს ოპოზიციპონერ წევრს, ლევან ხაბეიშვილის ცემის საქმეზე გამოძიება დაიწყო.