სულ ცოტა ხნის წინ მიცემულ ინტერვიუში ლეგენდარულმა ამერიკელმა რეჟისორმა გაამხილა, რომ სატელევიზიო შოუს გადაღებაზე ფიქრობს. ოღონდ, როგორც ტრადიციულად ტარანტინოსთვისაა დამახასიათებელი, ყველაფერი იმაზე ჩახლართულადაა, ვიდრე წარმოგვიდგენია.

თუ უკვე ნახეთ ოქროს გლობუსის ტრიუმფატორი და ოსკარის 10 ნომინაციის მქონე ფილმი Once Upon A Time In Hollywood, მაშინ აუცილებლად გემახსოვრებათ ფილმის მთავარი გმირი, რიკ დალტონი, რომლის როლსაც ლეონარდო დიკაპრიო ასრულებს.

ფილმში ნაჩვენები 70-იან წლებში განვითარებული ისტორიის მიხედვით, გამოგონილი მსახიობი, რიკ დალტონი ასევე გამოგონილ სატელევიზიო შოუ Bounty Law-ში ყაჩაღის, ჯეიკ კეიჰილის როლს ასრულებს. Once Upon A Time In Hollywood-ში ამ შოუდან ნაწყვეტებს და გადასაღებ მოედანს ვეცნობით.

როგორც ტარანტინომ ცოტა ხნის წინ განაცხადა, მას სურს, რომ მისი ფილმის სცენარისთვის გამოყენებული ეს სერიალი რეალურად გადაიღოს:

"მინდა, რომ ეს გავაკეთო, მაგრამ ამას წელიწადზე მეტი დრო დასჭირდება. მართალია, ამ შოუს შესახებ Once Upon A Time In Hollywood-დან გავიგეთ, მაგრამ არ მინდა, რომ სერიალი ვინმემ ფილმის ნაწილად მიიჩნიოს. ის არ იქნება კვლავ რიკ დალტონის შესახებ, რომელიც ჯეიკ კეიჰილის როლს ასრულებს, ის მთლიანად ჯეიკ კეიჰილზე მოგვითხრობს".

რეჟისორის თქმით, მისთვის ერთგვარი გამოწვევაა, როგორ მოახერხებს სერიალის გადაღებას:

"მაინტერესებს, შემიძლია თუ არა ამის გაკეთება. უკვე დავწერე ხუთი ნახევარსაათიანი ეპიზოდის სცენარი და ხუთივეს გადაღებას ვაპირებ".

Once Upon a Time... in Hollywood

ფოტო: SONY

ერთ-ერთმა ყველაზე ლეგენდარულმა რეჟისორმა, კვენტინ ტარანტინომ ჯერ კიდევ წლების წინ განაცხადა, რომ კინოსთან დამშვიდობებას აპირებს: როცა მის შემოქმედებაში 10 სრულმეტრაჟიანი ფილმი დაგროვდება, მას სურს, რომ თავისი შესაძლებლობები სხვაგანაც გამოსცადოს.

თუ გასულ წელს გამოსულ ფილმ Once Upon A Time In Hollywood-საც ჩავთვლით, მას უკვე 9 კინოსურათი აქვს გადაღებული (Kill Bill-ის პირველ და მეორე ნაწილებს თავად რეჟისორი ერთ სრულ ფილმად მოიაზრებს) და შესაბამისად, მას დამშვიდობებამდე ერთი ფილმის გადაღებაღა დარჩა.

ამ ალბათობის მიუხედავად, სულაც არ არის გამორიცხული, რომ ტარანტინომ თავისი რეჟისორული ოსტატობის გამოყენება სხვა ფორმით სცადოს, თუნდაც სერიალებში — დღეს ხომ სწორედ ამ ინდუსტრიის ბუმია.

აღსანიშნავია, რომ რამდენიმე კვირით ადრე ტარანტინომ საკულტო ფილმის, Kill Bill-ის მესამე ნაწილის გადაღების ალბათობაზეც ისაუბრა, შესაბამისად, შეგვიძლია თამამად ვივარაუდოთ, რომ რეჟისორი წინ კიდევ უამრავ სიურპრიზს გვიმზადებს.