მმართველი გუნდის წევრი და იურიდიული კომიტეტის თავმჯდომარე, ანრი ოხანაშვილი არ გამორიცხავს, რომ მასსა და მის ოჯახის წევრების მიმართ მუქარაში ბრალდებულმა, ვახტანგ რობაქიძემ თვითდაზიანებები თავად მიიყენოს და თავდასხმის ინსცენირება მოაწყოს. მისივე თქმით, რობაქიძე "შეკვეთით" მოქმედებდა და შესაძლოა "კიდევ უფრო მძიმე რამ ჰქონდა დაგეგმილი" და სისრულეში ბოლომდე ვერ მოიყვანა.

"ნაცვლად იმისა, რომ მოინანიოს ის ყველაფერი, რაც განახორციელა, მე არც იმას გამოვრიცხავ, რომ ამ ადამიანმა ან თვითდაზიანებები მიიყენოს, ან მასზე თავდასხმის ინსცენირება მოაწყოს. შემდგომ ჩემზე გამოიშვიროს ხელი. როგორც ჩანს, ეს ადამიანი ყველაფერს კადრულობს. ეს ზღაპრები მოუყვეს იმათ, ვინც ეს დაარიგეს", — განაცხადა ოხანაშვილმა.

ანრი ოხანაშვილისა და მისი ოჯახის წევრების მიმართ მუქარაში ბრალდებული, ვახტანგ რობაქიძე პოლიციას ძალადობაში ადანაშაულებს. მისი თქმით, პოლიციამ მუცლის არეში დაარტყა ხელი მაშინ, როცა მას ალკოჰოლურ თრობაზე ამოწმებდნენ.

პირზე პოლიციის მხრიდან სავარაუდო ძალადობაზე გამოძიება დაიწყო. საქმეს სახელმწიფო ინსპექტორის სამსახური იძიებს.

რობაქიძეს გუშინ, 19 იანვარს სასამართლომ აღკვეთის ღონისძიების სახით 7 ათასი ლარის ოდენობის გირაო შეუფარდა, რასაც ადვოკატი შერჩევით სამართალს უწოდებს. მისი თქმით, მსგავს საქმეებზე სხვა შემთხვევებში გირაოს რაოდენობა 2 ათას ლარს არ აღემატება.

ვახტანგ რობაქიძესა და ანრი ოხანაშვილს შორის ინციდენტი 14 იანვარს ბაკურიანში მოხდა. შინაგან საქმეთა სამინისტროს ინფორმაციით, რობაქიძემ ქართული ოცნების დეპუტატს სიტყვიერი შეურაცხყოფა მიაყენა და დაემუქრა.

რობაქიძე ამავე დღეს პოლიციისთვის დაუმორჩილებლობის ბრალდებით. ადმინისტრაციული სამართალდარღვევისთვის მას სამდღიანი პატიმრობა მიუსაჯეს.