მაშინ, როცა ისეთი დიდი კომპანიები, როგორებიცაა Disney, Amazon და Apple, თავიანთი სტრიმინგ სერვისებით გამოჩნდნენ, ამ ინდუსტრიის ბაზარზე კონკურენციის დონემ განსაკუთრებულად იმატა.

როგორც აღმოჩნდა, ნეტფლიქსი გაძლიერებული ძალებით აპირებს, რომ საკუთარი პოზიციები არ დათმოს: 2020 წელს ამ პლატფორმისთვის კონტენტის შექმნაზე $17,3 მილიარდი დაიხარჯება. შარშანდელთან შედარებით ამ კუთხით კომპანიის ბიუჯეტი გაზრდილია: 2019 წელს ნეტფლიქსმა პროექტებში $15,3 მილიარდი დახარჯა.

აღსანიშნავია ისიც, რომ კომპანია აპირებს ეს მაჩვენებელი ყოველწლიურად გაზარდოს — ნავარაუდებია, რომ განსახორციელებელი პროექტებისთვის ნეტფლიქსის ბიუჯეტი 2028 წლისთვის $26 მილიარდს მიაღწევს.

ამ სტრიმინგ სერვისმა სახელი თავისი საავტორო სერიალებით გაითქვა: იქნება ეს Orange Is the New Black, Stranger Things თუ The Crown. ნეტფლიქსმა გასულ წელსაც არაერთი ახალი შოუ შესთავაზა თავისი პლატფორმის მომხმარებლებს, რომლებმაც მილიონობით მაყურებელი მიიზიდა.

სატელევიზიო სივრცესთან ერთად ნეტფლიქსმა ფეხი მოიკიდა კინოინდუსტრიაშიც: წლევანდელი ოქროს გლობუსის დაჯილდოებაზე 17 ნომინაციით სწორედ ნეტფლიქსთან თანამშრომლობით შექმნილი ფილმები თუ სერიალები ლიდერობდნენ. ასევე ოსკარის წლევანდელ ნომინაციებში მოხვდა ნეტფლიქსის ისეთი კინოსურათები, როგორებიცაა The Irishman და Marriage Story.

შესაბამისად, თუ ნეტფლიქსის სამომავლო გეგმებს გავითვალისწინებთ, წინ კიდევ უფრო საინტერესო და მრავალფეროვანი ფილმები და სერიალები გველის.