ბოლო რამდენიმე წელია სატელევიზიო შოუებსა და ტრიმინგ-სერვისებს აყვავების პერიოდი უდგათ: აქამდე კარგად ცნობილი კომპანიების გვერდით სრულიად ახალი პლატფორმები გაჩნდა, რომლებიც ღირსეული კონკურენციის გაწევას აპირებენ: იქნება ეს Hulu, Disney+ თუ Amazon Prime Video.

მათ შორის განსაკუთრებული პოპულარობით სარგებლობს ნეტფლიქსი, რომელმაც მთელს მსოფლიოსთან ერთად საქართველოშიც მრავალი მომხმარებელი შეიძინა. ნეტფლიქსის პოპულარობას ისიც ადასტურებს, რომ წლევანდელ ოქროს გლობუსზე ყველაზე მეტი ნომინაცია სწორედ ამ კომპანიის მიერ წარმოებულმა პროდუქციამ მიიღო: 25 ნომინაციიდან 17 ნომინაციაში ნეტფლიქსის ფილმები თუ სერიალებია წარდგენილი და მათ შორის ყველაზე მეტი ნომინაციის მქონე ლიდერებიც სწორედ ნეტფლიქსთან თანამშრომლობით შეიქმნა.

ტრადიციულად კომპანიამ ერთგული მაყურებლები 2019 წელსაც მრავალფეროვანი სატელევიზიო შოუების არჩევანით გაანებივრა: იქნება ეს მხატვრული თუ დოკუმენტური ხასიათის სერიალები. შესაბამისად, საინტერესოა, თუ რომელ სერიალებს უყურებდა ყველაზე მეტი მაყურებელი გასულ წელს.

ნეტფლიქსის სტატისტიკა ასე გამოიყურება:

  • Stranger Things 3
  • The Witcher
  • The Umbrella Academy
  • Dead to Me
  • You: Season 2
  • When They See Us
  • Unbelievable
  • Sex Education
  • 13 Reasons Why: Season 3
  • Raising Dion

გასაკვირი არ არის, რომ ნეტფლიქსის პლატფორმაზე განსაკუთრებული პოპულარობით ფენტეზისა თუ სამეცნიერო ფანტასტიკის ჟანრის შოუები სარგებლობს: თანამედროვე ეპოქაში სწორედ ამ ჟანრების ბუმია.

Stranger Things უკვე წლებია არა მხოლოდ ნეტფლიქსის, არამედ მთელ სატელევიზიო სივრცეში ერთ-ერთი ყველაზე პოპულარული სერიალია, რომლის ყოველი ახალი სეზონის გამოსვლას მილიონობით მაყურებელი ელოდება.

ამ ლამის უკვე საკულტოდ ქცეულ სატელევიზიო შოუს პოპულარობით მოსდევს ეკრანებზე სულ ახლახანს გამოჩენილი The Witcher, რომლის პრემიერაც წლის მიწურულს, 20 დეკემბერს შედგა, თუმცა, როგორც ჩანს, მაინც მოახერხა ლიდერთა სიაში ღირსეული ადგილი დაეკავებინა.

აღსანიშნავია, რომ ათეულში მეტ-ნაკლებად გასართობი ხასიათის პროექტების გვერდით მოხვდა ისეთი დრამატული სერიალებიც, როგორებიცაა When They See Us და Unbelievable, რომლებიც სხვადასხვა მნიშვნელოვანი სოციალური პრობლემების შესახებ მოგვითხრობს.