პარლამენტში უმრავლესობის ყოფილი დეპუტატი ლევან კობერიძე ამბობს, რომ პრემიერ-მინისტრმა გიორგი გახარიამ თვითონაც არ იცის "ბოლო სერიაში რა ელის".

"რეჟისორი და სცენარის ავტორი ვინც არის ვიცით და იმას როგორც მოაფიქრდება თავში, დარწმუნებული ვარ, არც არავინ იცის მათთვის ბოლო სერიაში რა იქნება. არ მგონია, გახარიამაც იცოდეს, ბოლო სერიაში რა ელის", — თქვა კობერიძემ მთავარ არხთან.

დეპუტატი ამბობს, რომ მთავრობის ამჟამინდელი შემადგენლობა არჩევნებს ვერ მოიგებს და დიდი ალბათობით, ბევრი მინისტრი შეიცვლება.

დღეს, 17 იანვარს პრემიერმა გიორგი გახარიამ ჟურნალისტების კითხვაზე, ტოვებს თუ არა თანამდებობას, უპასუხა, რომ "ფინალურ სერიას დაელოდონ".

"თქვენ ისე დაჟინებით მეკითხებით, მაინცდამაინც გინდათ, რომ დაგასპოილეროთ? დაელოდეთ ფინალურ სერიას", — განაცხადა გახარიამ.

მედიაში გავრცელებული ინფორმაციით, გიორგი გახარია პრემიერ-მინისტრის პოსტს მალე დატოვებს.

გიორგი გახარიას პრემიერ-მინისტრად 8 სექტემბერს დაინიშნა. მიუხედავად იმისა, რომ გიორგი გახარიას შინაგან საქმეთა მინისტრის თანამდებობიდან გადადგომას საზოგადოების ნაწილი სამ თვეზე მეტ ხანს ითხოვდა, მმართველმა პარტიამ იგი დააწინაურა და პრემიერ-მინისტრის პოსტზე მამუკა ბახტაძის შემცვლელად აირჩია.