ევროპარლამენტი ევროკავშირის საბჭოს მოუწოდებს საქართველოსთვის ვიზების ლიბერალიზაციის მიზნით მოლაპარაკებები შემდგომი გადავადების გარეშე დაიწყოს.

წერილში, რომელსაც ევროპარლამენტის სამოქალაქო თავისუფლებათა, მართლმსაჯულებისა და შინაგან საქმეთა კომიტეტი, ევროკავშირის საბჭოს თავმჯდომარე ქვეყანა სლოვაკეთს უგზავნის, დეპუტატები მოუწოდებენ საბჭოს საქართველოსთვის სავიზო ლიბერალიზაციის საკითხთან დაკავშირებული სამმხრივი მოლაპარაკებები რაც შეიძლება მალე, ნოემბრის დასაწყისში გამართონ.

ევროპარლამენტარები აღნიშნავენ, რომ არ არსებობს საქართველოსთვის სავიზო ლიბერალიზაციაზე მოლაპარაკებების გადადების მიზეზი. წერილის ავტორები უკმაყოფილებას გამოთქვამენ საბჭოს იმ გადაწყვეტილების გამო, რომ სამმხრივი მოლაპარაკებბები არ დაიწყება მანამ, სანამ შეჩერების მექანიზმის ამოქმედებაზე არ შეთანხმდებიან:

"ჩვენი მთავარი პრინციპია, რომ ყველა ქვეყანას, რომელიც აკმაყოფილებს ყველა კრიტერიუმს შეუძლია მიიღოს სარგებელი ვიზალიბერალიზაციისგან და საქართველოს შემთხვევა სწორედ ასეთია, ამიტომაც ეს საკითხი აღარ უნდა გადაიდოს", - ნათქვამია წერილში რომელიც კომიტეტის თავმჯდომარემ კლოდ მორაესმა და მომხსენებელმა მარია გაბრიელმა შეადგინეს.