კომერსანტის ინფორმაციით, ფოთის ახალ ქარხანაში აჭარა ტექსტილი სპორტულ ტანსაცმელს Nike-ისა და New Balance-ის დაკვეთით შეკერავს. კომპანიის ფინანსური დირექტორი, გია ლომინაძე რადიო კომერსანტთან საუბარში აცხადებს, რომ შეკვეთები გაიზარდა, დაემატათ ახალი ბრენდები და შესაბამისად, აუცილებელი გახდა საწარმოო მოცულობის ზრდა.

ლომინაძე განმარტებით, ფოთში მდებარე ქარხანა იმაზე დიდი იქნება ვიდრე აჭარაში აქვთ, მშენებლობა 2017 წელს დასრულდება და დამატებით 3 ათასი ადამიანი დასაქმდება, რომელთა გადამზადება პარალელურ რეჟიმში მოხდება, რადგან დღეს კვალიფიციური კადრების დეფიციტია.

ლომინაძე ასევე განმარტავს, რომ ახალ ქარხანაში მხოლოდ სპორტული ტანსაცმელი, შორტები და მაისურები შეიკერება, რომელიც 100 პროცენტით ექსპორტზე გავა. მისი თქმით, დაკვეთები მსოფლიოში ცნობილი ბრენდებისგან NIKE, New Balance, Under Armour-ისგან ექნებათ.

როგორც ცნობილია, ამ ეტაპზე კომპანია მოლაპარაკებებს დანადგარების შეძენასთან დაკავშირებით აწარმოებს. პროექტში პირველ ეტაპზე 10 მილიონის, შემდეგ კი დამატებით 5 მილიონი დოლარის ინვესტიცია ჩაიდება.