5 იანვარს ლოს-ანჯელესში, სასტუმრო ბევერლი ჰილტონში გამართულ ოქროს გლობუსის 77-ე დაჯილდოებაზე მსახიობი ხოაკინ ფენიქსი ჯერ წითელ ხალიჩაზე, მოგვიანებით კი სცენაზე კაცის საუკეთესო როლის შესრულებისთვის მიღებული ჯილდოს ასაღებად სცენაზე Stella McCartney-ის კოსტიუმით წარსდგა.

როგორც რამდენიმე დღის წინ გახდა ცნობილი, ამ სამოსით ის უკანასკნელად არ გვიხილავს: სახელოვანმა ბრიტანელმა დიზაინერმა, სტელა მაკარტნიმ, რომელიც ამავდროულად ცხოველების უფლებების ცნობილი დამცველიცაა, ინსტაგრამის ოფიციალურ გვერდზე ინფორმაცია გაავრცელა, რომ მსახიობი ხოაკინ ფენიქსი მის მიერ შექმნილ კოსტიუმს ამ წლის ყველა დაჯილდოებაზე ჩაიცვამს.

"მას ჩემი ბრენდის ტანსაცმელი აცვია, რადგან მან არჩევანი პლანეტისა და მისი ყველა ქმნილების მომავლის სასარგებლოდ გააკეთა. მან ასევე გადაწყვიტა, რომ ეს ერთი და იგივე კოსტიუმი ეცვას ყველა დაჯილდოებაზე, რათა გარემოს დაბინძურება შეამციროს", — წერს მაკარტნი.

მოდის სამყაროში სტელა მაკარტნიმ სახელი თავისი პოლიტიკური განცხადებებით გაითქვა: ის აქტიურად ეწინააღმდეგება ცხოველების წამებასა და ექსპლუატაციას, რის გამოც ის საერთოდ არ იყენებს ცხოველების ტყავს, ბეწვსა თუ ბუმბულს სამოსის შექმნისას.

როგორც ვიცით, თავად ხოაკინ ფენიქსიც სამსახიობო კარიერასთან ერთად აქტიურად იბრძვის ცხოველების უფლებების დაცვისთვის. მაგალითად, ოქროს გლობუსის დაჯილდოებაზე უცხოური პრესის ასოციაციას მადლობა საჯაროდ გადაუხადა, რომ ცერემონიის ფარგლებში მხოლოდ ვეგანური საკვები იყო წარმოდგენილი:

"ძალიან გაბედული გადაწყვეტილებაა, რომ ამ საღამოს მხოლოდ მცენარეული საკვების მირთმევა შეგვეძლება. ეს ძალიან მნიშვნელოვანი გზავნილია ყველასთვის".

10 იანვარს კი ჯეინ ფონდას მიერ ორგანიზებულ აქციაზე, სადაც ასეულობით დემონსტრანტი კლიმატის ცვლილების მოსალოდნელ შედეგებთან ბრძოლის არასათანადო მეთოდებს აპროტესტებდა, ხოაკინ ფენიქსი დააპატიმრეს.

სულ ცოტა ხნის წინ ამერიკის კინოაკადემიამ მსახიობი ოსკარის 92-ე დაჯილდოებაზეც წარადგინა ჯოკერის როლის შესრულებისთვის ნომინაციაში მთავარი როლის შემსრულებელი მსახიობი კაცი, შესაბამისად მას სულ მალე, 10 თებერვალს ოსკარების დაჯილდოებაზეც ვიხილავთ.