კორპორატიული საღამოდან გამოსულმა მოსამართლე ნინო ქადაგიძემ მთავარის ჟურნალისტს უთხრა, რომ ახალი წლის დღეებში ეუთოს დასკვნაზე საუბრის დრო არაა.

"გავეცანი ეუთოს დასკვნას. ახალი წლის დღეებში ამაზე რომ არ გვესაუბროთ, ხო შეიძლება?" — ამბობს მოსამართლე.

12 იანვრის საღამოს მოსამართლეები რესტორან მარანი ჰოლში იყვნენ. ნინო ქადაგიძის თქმით, მათ ახალი წელი მიულოცეს ერთმანეთს.

უზენაესი სასამართლოს მოსამართლეების დანიშვნის პროცესზე ეუთო/ოდირის ანგარიშში ნათქვამია, რომ გამოვლინდა რიგი დარღვევები. მათ შორის, ხაზგასმულია უშუალოდ საბოლოო დანიშვნის ეტაპი.

ანგარიშში მოხვდა მოსამართლეთა კვალიფიკაციის საკითხიც. როგორც დოკუმენტში ვკითხულობთ, რიგი კანდიდატები არ აკმაყოფილებდნენ მინიმალური იურიდიული განათლების მოთხოვნას. სამუშაო ჯგუფმა დაადასტურა ყველა კანდიდატის შესაბამისობა დიპლომების გადამოწმებამდე, თუმცა, გადამოწმებული ინფორმაცია არ გამოქვეყნებულა, რამაც შეასუსტა პროცესის გამჭვირვალობა და სამართლიანობა.