დაავადებათა კონტროლის ცენტრის ხელმძღვანელი ამირან გამყრელიძე აცხადებს, რომ 2000-ზე მეტი ადამიანის სამყოფი C ჰეპატიტის სამკურნალო წამლების გაფუჭება არ ნიშნავს, რომ მათი გამოყენება ვერ მოხდა. მისი თქმით, ქვეყანა ყოველთვის ზედმეტს ყიდულობს, რადგან ასეთ დროს "მთავარია, არ დაგაკლდეს".

"რას ნიშნავს ვერ მოხდა [მედიკამენტების გამოყენება]? ვერ მოხდა კი არა, ქვეყანას ყოველთვის უნდა ჰქონდეს მარაგში, მეტობით იღებს გაანგარიშების დროს ყოველთვის", — განაცხადა მან ტელეკომპანია იმედის ეთერში.

მან მაგალითად მოიყვანა სხვადასხვა ვაქცინები და მედიკამენტები, რომელსაც მისი თქმით, ქვეყანა იმაზე მეტს ყიდულობს, ვიდრე სჭირდება. ამის მიზეზად კი ის დაასახელა, რომ ყველა საავადმყოფოში უნდა იყოს მარაგი, რომელსაც საჭიროების შემთხვევაში გამოიყენებენ.

გუშინ, 10 იანვარს აუდიტის სამსახურმა ანგარიში გამოაქვეყნა, რომლითაც გაირკვა, რომ საქართველოს ჯანდაცვის სამინისტროს 560 645 083 ლარის ღირებულების C ჰეპატიტის სამკურნალო მედიკამენტები გაუფუჭდა. მონაცემები 2018 წლის 31 დეკემბრამდე პერიოდს მოიცავს. შესაბამისად, უცნობია 2020 წლის 10 იანვრის მონაცემებით გაზრდილია თუ არა ეს თანხა და რა მოცულობით.

ჯანდაცვის სამინისტროს ინფორმაციით, C ჰეპატიტის ელიმინაციის სახელმწიფო პროგრამა 2015 წლის 21 აპრილს ამოქმედდა. პროგრამა ამერიკის შეერთებული შტატების დაავადებათა კონტროლის ცენტრისა და მედიკამენტის მწარმოებელი კომანია გილეად-ის მხარდაჭერით ხორციელდება და საქართველოს ყველა მოქალაქისთვის უფასოა. მოქალაქეს შეუძლია პრევენცია, დაავადების დიაგნოსტიკა და მკურნალობა.

ამავე თემაზე: ეს ბიუჯეტის ფული არ ყოფილა — დაავადებათა კონტროლის ცენტრი 561 მლნ ლარის C ჰეპატიტის წამლების გაფუჭებაზე