თავისუფალი დემოკრატები ჭიათურაში მეორე ტურში მონაწილეობას და ამ მაჟორიტარული მანდატის მოპოვებას გეგმავენ. ამის შესახებ რუსთავი 2-თან პარტიის ერთ-ერთმა წევრმა, ნინო გოგუაძემ განაცხადა.

"ჩვენ გვაქვს ძალიან ძლიერი პოზიციები. ჩვენი კანდიდატი - თემურ გაფრინდაშვილი გასულია პირველ ადგილზე. მიუხედავად იმისა, რომ მიდი ძალიან უსუფთაო კამპანია მთელ საქართველოში და მათ შორის ჭიათურაში, მიდის ადმინისტრაციული რესურსის გამოყენება, მიდის ადამიანების დაშინება, დახმარების მოხსნის კუთხით, მათ შორის საჯარო სამსახურში დასაქმებულთა გათავისუფლების კუთხით და ა.შ. დიახ, ჩვენ ვგეგმავთ, რომ ვიბრძოლოთ ამ ერთი მანდატისთვის. ჩვენ ჩავალთ ჭიათურაში დავუდასტურებთ იმას, რომ ბრძოლას ყოველთვის აქვს აზრი და ის ადამიანი, რომელიც ასე არ ნებდება და იბრძვის ჭიათურისთვის აუცილებლად გაიმარჯვებს. აუცილებლად ძალიან კვალიფიციური და ძლიერი მაჟორიტარი ეყოლება ჭიათურას."

თავისუფალმა დემოკრატებმა 2016 წლის საპარლამენტო არჩევნებში 5 პროცენტიანი ბარიერი ვერ გადალახეს. მაჟორიტარი დეპუტატების კანდიდატებიდან მხოლოდ ირაკლი ალასანიამ და თემურ გაფრინდაშვილმა დააგროვეს საკმარისი ხმა მეორე საარჩევნო ტურისთვის, თუმცა ალასანიამ და სხვა ლიდერებმა მოულოდნელად პარტიის რიგები დატოვეს.

თავისუფალი დემოკრატების აღმასრულებელმა მდივანმა, თამარ კეკენაძემ 13 ოქტომბერს On.ge-ს უთხრა, რომ პარტია მეორე ტურში მხოლოდ საკუთარ კანდიდატს უჭერს მხარს.