წლის პირველი ორშაბათი მხოლოდ იმიტომ კი არაა ცუდი, რომ ახალი წლების შემდეგ რუტინაში გვიწევს დაბრუნება, ეს ამავე დროს ის დღეცაა, როცა ადვოკატებთან გაშორების მსურველების რიგები დგება, გუგლში კი განქორწინებასთან დაკავშირებული ძიებები რეკორდულად იმატებს.

სიტყვა "განქორწინების" ძიება 6 იანვრიდან 12 იანვრამდე წინა პერიოდთან შედარებით 51%-ით იზრდება.

"წყვილები, რომლებმაც უკვე მოიხადეს ვალი და გადატვირთული შობა-ახალი წელი ერთად გაატარეს, სწორედ ამ დღეს იღებენ გადაწყვეტილებას, რომ ახალი წელი ახალი ფურცლიდან დაიწყონ", - ამბობს ფსიქოლოგი ჩერლინ ჩონგი.

უცნაურია, რომ ერთდროულად სხვადასხვა წერტილში მცხოვრებ უამრავ ადამიანს ერთი და იგივე აზრი უჩნდება, თუმცა ამას ლოგიკური მიზეზებიც აქვს. შობის წინ ბავშვების განაწყენება არავის უნდა და რადგან დღესასწაულის აღნიშვნაში ორივე მხარის ოჯახები არიან ჩართულები, ბევრად უფრო ადვილია განქორწინებაზე საუბარი იანვრის დასაწყისისთვის გადაიდოს.

გარდა ამისა, ახალი წელი კიდევ უფრო გვამახვილებინებს ყურადღებას უკვე არსებულ პრობლემებზე. ახალი წლის წინა პერიოდში ადამიანები ცვლილებებზე იწყებენ ფიქრს და ხშირად იღებენ რადიკალურ გადაწყვეტილებებს, რომლებიც სინამდვილეში თვეების განმავლობაში მზადდებოდა.

მეორე მხრივ, ეს შეიძლება სულაც არ იყოს სევდიანი. განქორწინების დღე იმაზე მიანიშნებს, რომ მაშინაც კი, როცა სიყვარული გამქრალია, ადამიანები ცდილობენ, პარტნიორებს დღესასწაული არ გაუფუჭონ.