გავრცელებული აზრის თანახმად, ადამიანები ორ კატეგორიად იყოფიან: ისინი, ვისაც ხალხთან ერთად ყოფნა უყვარს და ისინი, ვისაც ურჩევნია, თავი შორს დაიჭიროს. სიმართლე, ცხადია, ასეთი სწორხაზოვანი არაა. უამრავ ადამიანს მოსწონს სხვებთან ურთიერთობა, მაგრამ კონკრეტული დროით. ხალხმრავალი სიტუაციების შემდეგ ასეთ ადამიანებს "დატენვა" სჭირდებათ, რაც სახლში ყოფნას, ნეტფლიქსის ყურებას და სოციალიზაციისგან თავის შეკავებას გულისხმობს. ალბათ, ამ მომენტისთვის უკვე იცით, რომ ინტროვერტებზე ვსაუბრობთ.

ჯგუფთან ერთად მოგზაურობა ინტროვერტებისთვის დასვენების საუკეთესო ფორმა არაა, თუმცა ასეთი სიტუაციების თავიდან არიდება ხანდახან შეუძლებელია. სიმართლე რომ ვთქვათ, რატომ უნდა თქვა მოგზაურობაზე უარი მხოლოდ იმის გამო, რომ სხვა ადამიანებთან ერთად მოგიწევს დროის გატარება? უამრავი ქვეყანაა სანახავი, უამრავი გემრიელი საჭმელი - გასასინჯი და უამრავი თავგადასავალი, რომელიც კომფორტის ზონის გარეთ გელოდება.

ვეცდებით, ამ რჩევებით ცოტათი გაგიადვილოთ ჯგუფთან ერთად მოგზაურობა.

1. ისუნთქე ღრმად და შეეცადე, თავი უარყოფითი აზრებით არ დატვირთო

ფოტო: Lily / Dribble

პირველ რიგში, მითებისგან უნდა გათავისუფლდე. მომზადება დადებითი ემოციებით დაიწყე. იფიქრე იმაზე, რომ ეს არის შანსი, უკეთ გაიცნო საკუთარი თავი, გარშემომყოფებს კი კიდევ ერთხელ შეახსენო, რომ ხანდახან მარტო ყოფნის სურვილი სულაც არ ნიშნავს მორცხვობას ან ადამიანების სიძულვილს.

რა თქმა უნდა, რამდენიმე წამში შეგიძლია ჩამოთვალო უამრავი მიზეზი, რის გამოც არ ხარ ჯგუფური მოგზაურობის გულშემატკივარი. თუმცა ისიც ხომ ფაქტია, რომ შენი მეგობრები ძალიან გიყვარს და სულაც არაა აუცილებელი, მოგზაურობისას აბსულუტურად ყველა აქტივობაში ერთად ჩაერთოთ.

2. იგრძენი თავი ისე, როგორც საკუთარ სახლში

ფოტო: Lily / Dribble

უნდა გახსოვდეს, რომ მარტოობის შექმნა ყველგან შეგიძლია, სწორედ ამისთვის არსებობს ყურსასმენები, წიგნები და ფილმები. თუ ბინას Airbnb-ზე ქირაობთ, მოძებნე და მოიწყვე შენი კუთხე, სადაც ყველაფერი იქნება, რაც კომფორტისთვის გჭირდება. ამ გზით, რამდენიმე წამში შეიქმნი იდეალურ გარემოს, მაშინაც კი, თუ სახლიდან შორს ხარ.

3. მოდი, დავიცვათ წესები

ფოტო: Lily / Dribble

მოგზაურობის დაწყებამდე შეუთანხმდი ჯგუფის წევრებს გარკვეულ წესებზე. მაგალითად, თუ ყველა მუზეუმის მოვლას არ აპირებ, თავიდანვე თქვი. თუ ხანდახან სახლში ან სასტუმროში მოგინდება დარჩენა, ესეც არ უნდა იქცეს პრობლემად. მოგზაურობა არ ნიშნავს ყველაფრის ერთად კეთებას და სულაც არ ხარ ვალდებული, სხვებთან ერთად არჩიო საჩუქრები მათი ოჯახის წევრებისათვის. არ მოგერიდოს იმის თქმა, კონკრეტულად რას ელი ამ გამოცდილებიდან.
ეს არ გააფუჭებს თქვენს საერთო ჩანაფიქრს, უფრო - პირიქით.

4. ვისთან ერთადაც ვართ, იმათ ქუდებს არ ვიხურავთ

ფოტო: Lily / Dribble

ჯგუფური მოგზაურობის დროს აუცილებელია, დააბალანსო მარტოობა და სოციალიზაცია. ამის მიღწევა შედარებით რთულია, თუმცა შეუძლებელი არაა. არასდროს დათანხმდე შენთვის არც ისე მიმზიდველ იდეას იმის გამო, რომ უარის თქმა გერიდება. მნიშვნელოვანია, დააკვირდე, რას გრძნობ მთელი მოგზაურობის დროს. თუ მოგზაურობისას ხვდები, რომ ფიზიკურად ან ემოციურად გადაიღალე, შეისვენე, ყავა დალიე და შენს თავს გაახსენე, რა გეგმები გქონდა უცხო ქვეყნის უკეთესად შესაგრძნობად. თუ შენი გეგმები დასვენება იყო, წამითაც არ დაიდანაშაულო თავი იმაში, რომ მთელი დილა საწოლში გაატარე და არა - ღირსშესანიშნაობების მონახულებაში.

5. და ბოლოს: მოგზაურობის შემდეგაც რომ უნდა გახსოვდეთ, აი, ის რჩევა

ფოტო: Lily / Dribble

საჭიროებისამებრ, რამდენიმე საათი გამოყავი მხოლოდ შენთვის. შეგიძლია დილაობით "სამეზობლოში" იხეტიალო, გასინჯო ადგილობრივი კერძები, დააკვირდე ქალაქის ტემპს, მოსახლეობას და მათ ცხოვრების სტილს და თვეების განმავლობაში სამყოფი ენერგიით დაიმუხტო. გახსოვდეს, თავის დაძვრენა მარტივად შეგიძლია სიტყვათა კომბინაციით "სუფთა ჰაერზე გავივლი". არა მხოლოდ მოგზაურობისას, არამედ - ზოგადადაც. რომელმა მონსტრმა უნდა დაგიშალოს სუფთა ჰაერზე გასეირნება?!

მიუხედავად იმისა, რომ შეიძლება ჯგუფური მოგზაურობისას საკუთარი პრიორიტეტები გადაგავიწყდეს, მაგრამ ეს არის შანსი, რომელმაც შეიძლება უკეთესი გაგხადოს შენც და შენი თანამგზავრებიც.

ამიტომ სანამ რაიმეს არ გამოცდი, ნუ იტყვი, რომ ეს საშენო არაა. ინტროვერტებსაც შეუძლიათ სხვებთან ერთად სიამოვნების მიღება და გაზიარება.

დაიღალეთ იმის გამოცნობით, თუ როდისაა ბილეთები ყველაზე იაფი? იაფი ავიაბილეთების მარტივად აღმოსაჩენად, შეგიძლიათ ავიაბილეთების კალენდარი გამოიყენოთ. კალენდარი ყველა ხელმისაწვდომ ვარიანტს გიჩვენებთ შერჩეული პერიოდისთვის და რაც უფრო მეტ თვეს აირჩევთ, მით უფრო მეტი შანსია, ბილეთებს შესაშურად იაფად გამოჰკრათ ხელი.