ბაღდადის აეროპორტზე საჰაერო შეტევისას ირანის ისლამური რევოლუციის გუშაგთა კორპუსის ქვედანაყოფის, "ქუდსის ძალების" ლიდერი, გენერალი ყასემ სოლეიმანი მოკლეს. BBC-ის ცნობით, საჰაერო დარტყმისას გენერალი სოლეიმანი მანქანით მიჰყავდათ სამხედროებს აეროპორტის ტერიტორიაზე.

ირანის ლიდერმა, აიათოლა ალი ხამენეიმ მომხდარზე თქვა, რომ "სასტიკი შურისძიება ელით მათ, ვინც ამ კრიმინალის უკან დგას". მან ირანში 3-დღიანი გლოვა გამოაცხადა.

გენერალი სოლეიმანი ირანის რეჟიმის მთავარი ფიგურა იყო. მის "ქუდსის ძალებს" აშშ ტერორისტებად მოიაზრებდა, რომელბიც ასობით ამერიკელის სიკვდილზე იყვნენ პასუხისმგებელი.

პენტაგონის წარმომადგენელმა უკვე დაადასტურა, რომ ეს იყო პრეზიდენტ ტრამპის განკარგულებით ჩატარებული ოპერაცია:

"პრეზიდენტ ტრამპის განკარგულებით, აშშ-ს ჯარი გადამწყვეტ, თავდაცვით მოქმედებაზე გადავიდა ამერიკელების დასაცავად. ეს შეტევა ირანის სამომავლო თავდასხმის შეჩერებას ისახავდა მიზნად. შეერთებული შტატები კვლავ განაგრძობს ყველა საჭირო ზომის მიღებას რათა დაიცვას საკუთარი მოქალაქეები და ქვეყნის ინტერესები მსოფლიოს ნებისმიერ კუთხეში".

დონალდ ტრამპმა მომხდარის შემდეგ ტვიტერზე ამერიკის შეერთებული შტატების დროშის ფოტო გამოაქვეყნა. ამასთან, თავდასხმის შემდეგ ნავთობის ფასმა გლობალურად 4 პროცენტით იმატა.

აშშ-ს სახელმწიფო მდივანი, მაიკ პონპეო ტვიტერზე აქვეყნებს ვიდეოს წარწერით:

"ერაყელები ქუჩაში ზეიმობენ თავისუფლებას, მადლიერები არიან, რადგან გენერალი სოლეიმანი აღარ არის".

დრონით შეტევა მას შემდეგ განხორციელდა, რაც ბაღდადში, აშშ-ს საელჩოს დაესხნენ თავს. პენტაგონის ცნობით, გენერალი სულეომანი იყო ამაზე პასუხისმგებელი.