შვილმკვდარი მამა, მალხაზ მაჩალიკაშვილი ამბობს, რომ პარლამენტის წინ კარავი მანამ იდგმება, სანამ ხელისუფლება შეცდომას არ აღიარებს. ამის შესახებ მან მთავარ არხთან ისაუბრა. მალხაზ მაჩალიკაშვილს კარავი გუშინ დაუშალეს და მის ადგილას საბავშვო ბატუტი დადგეს.

"ამათ იხელთეს დრო ჩემი აქ არყოფნის დროს, მოვიდნენ 12 საათზე და აიღეს კარვები. სანამ არ იტყვის სახელმწიფო, დიახ ჩვენ დავაშავეთ და მოვკალით მძინარე ბავშვი უდანაშაულოდ, კარავი იდგმება. სანამ პარლამენტი არ შექმნის დროებით საგამოძიებო კომისაის ბანერი იდგმება, აი თუ არ იდგმება აქ მე და აქ ეს დაწყევლილი ქართული ოცნება", — თქვა მალხაზ მაჩალიკაშვილმა.

მალხაზ მაჩალიკაშვილმა კარვების აყრის შემდეგ საზოგადოებას სთხოვა, რომ არ მიიყვანონ შვილები იმ ადგილას, სადაც სამი წელია შვილის მკვლელის სახელის გარკვევას ცდილობს.

პარლამენტის წინ ტერიტორია 31 დეკემბერს, დაახლოებით, ღამის პირველის ნახევარზე გაწმინდეს. კარვების გარდა, რუსთაველის გამზირზე იყო აქციებისთვის საჭირო ატრიბუტიკა — დროშები, "გახარიას ბიუსტი" და ბანერები. კარვების დაშლას ადგილზე დაპირისპირება მოჰყვა, შინაგან საქმეთა სამინისტრომ ღამით 9 აქტივისტი დააკავა.უწყების განცხადებით, დაკავებულებს წვრილმან ხულიგნობასა და პოლიციისადმი დაუმორჩილებლობას ედავებიან.

მოძრაობა #სირცხვილიას ინფორმაციით, დაკავებულებს შორის არიან აქტივისტები: ზუკა ბერძენიშვილი ბექა კოკაია, ნოდარ რუხაძე, ბექა ბასილია, ზურა მჟავანაძე და გიორგი მუმლაძე. აქტივისტებმა განვითარებული მოვლენების შემდეგ 31 დეკემბერს, 10 საათზე მალხაზ მაჩალიკაშვილისა და თორნიკე მამალაძის მხარდასაჭერად აქცია დაგეგმეს.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთაველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.

გაიგეთ მეტი პარლამენტთან მიმდინარე დაპირისპირებაზე: